Dewijî bi destûrnameyan şonê keyeyanê xo û ambargoyê zadî yeno ramitene

• Dewijê derûdorê Koyê Cûdîyî bi destûrnameyan şonê keyeyanê xo û hetê cendirmeyan ra nan û zad sînorkerde dîyeno dewijan.

Dewijê derûdorê Koyê Cûdîyî bi destûrnameyan şonê keyeyanê xo û hetê cendirmeyan ra nan û zad sînorkerde dîyeno dewijan.

Tirkîya 17ê Nîsane ra nat hêrîşa mintiqayanê Zap, Avaşîn û metînayî kena. Nê hêrîşan de PDK zî paştî dana Tirkîya. Badê nê hêrîşan, 30ê Nîsane de Koyê Cûdîyî de zî operasyonî ameyê dest pêkerdiş. Cûdî de şerêko giran qewimîya û hema zî dewam keno. 

Bi destpêkerdişê operasyonan, 10ê Gulane de dewanê Girgê Amo(Silopya)yî yê Xinis, Şemga, Sorbitnê û Girêçolyayî rê qedexeyê şîyayîş-ameyîşî ame dayene. Dewan de cayê kontrolî ameyê ronayene û şar bi destûrnameyan eşkeno şoro dewanê xo û hêgayanê xo. Kesê ke meeşkê destûrname bigerê nêşkenê bikewê dewe. Reyna 15 gulane de perê bînî yê Cûdîyî de dewanê Serêdehlê, Avgamasya Kevin û Şilêrûtî rê qedexeyê şîyayîş-ameyîşî ame dayene.

Cezaya pereyan û sînorkerdişê zadî

Goreyê malûmatan xeylê welatîyan rê 2 hezar TL cezaya pereyan ameya dayene. Reyna goreyê malûmatan hetê cendirmeyan ra nan û zad sînorkerde dîyeno dewijan. Dest nîyayo nan û zadê dewijan ser dima verdayê ke bivîyerê.

Dewijêko ke nêwaşto nameyê xo vajo, meseleye ser o qisey kerdo û vato, “Ma walîtîye ra destûrname genê û destûrnameyî eşkenê şorê dewa xo. Eskerî ewnîyenê destûrnameyan, dima nasnameyanê ma kontrol kenê, badê zî ewnîyenê wesayîtan ra. Eke keyeyêk ra 8 kesî bikewê dewe, sereyê merdimêk nanêk dîyeno ci. Ma înan ra zêder nêşkenê bigerê. Eke zêde bo, eskerî dest nanê nan û zadî ser yan zî nêverdenê ê dewijî bikewê dewe.”

MA / ŞIRNEX