Egîtîm Sen: Ma dersa weçînitî ney, perwerdeyê ziwanê dayîke wazenê

sêşem 19 tîrmehê 2022 - 08:09

  • Serekê Şûbeya Egîtîm Senî ya Wanî Murat Atabeyî va, “20 hezar mamosteyan ra Kurdkî rê abirnayîşê 3 mamosteyan Kurdan rê heqeret o. Ma heqê perwerdeyê ziwanê dayîke pawenê.”

Serekê Şûbeya Egîtîm Senî ya Wanî Murat Atabeyî va, “20 hezar mamosteyan ra Kurdkî rê abirnayîşê 3 mamosteyan Kurdan rê heqeret o. Ma heqê perwerdeyê ziwanê dayîke pawenê.”

Tirkîya de 600 hezar mamosteyî bêkar ê. Goreyê malûmatan hewcedarîya 120 hezar mamosteyan esta. Wezaretîya Perwerdeyî kerde eşkera ke do Êlule de 20 mamosteyî bêrê tayînkerdiş. Seba mamostetîya Kurdkî tena 3 kontenjanî ameyê abirîyayîş. Serekê Şûbeya Egîtîm Senî ya Wanî Murat Atabeyî no derheq de qisey kerdo.

‘Ma dersa weçînitî nêwazenê’

Murat Atabeyî va, “Ma sere ra nat qebûl nêkerd ke Kurdkî bi dersa weçînitî bêra dayene. Ma heqê perwerdeyê ziwanê dayîke pawenê. Tirkîya de 30 mîlyon Kurdî cuwîyenê. Kurdî nêşkenê kursanê ziwanê xo akerê. Dezge û sazgeyê ke Kurdkî ser o xebitîyenê bi KHKyan yenê padayîş. Heqê Kurdan o ke ziwanê xo de perwerde bigerê. Dersa weçînitî Kurdan rê heqeret o. Bi nê kerdenanê xo vanê, ‘Şima bingeyê nê welatî nîyê û şima Tirkan de têduştî nîyê’. Ganî her kes bieşko bi ziwanê xo perwerde bivîno.

‘Şima mecbûr ê mezûnan tayîn bikerê’

Serekê Şûbeya Egîtîm Senî ya Wanî Murat Atabeyî peynî de va, “Beşanê mamostetîya Kurdkî ya zaningehan ra her serre nêzdîyê 200 kesî mezûn benê. Şima biwazê pê Kurdan bixapînê zî, şima mecbûr ê mezûnan tayîn bikerê. Seba mamostetîya Kurdkî abirnayîşê 3 kontenjanan fikrê înan eşkera keno. Ê vanê seba ke dersa Kurdkî meweçînîya çi ma dest ra yeno ma kenê. Nêwazenê dersa Kurdkî bêra weçînayîş û domanan ser o bandor kenê. Wexto ke wendekaran dersa Kurdkî weçîna, o wext zî vanê mamosteyî çin ê û sinifanê Kurdkî anêkenê.”

MA/WAN

 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.