Emîne Şenyaşar vernîyê edlîya de ya: Tîya bi keyeyê mi

yekşem 10 tîrmehê 2022 - 16:01

  • Emîne Şenyaşar lajê xo reyde roşanê xo vernîyê Edlîyaya Rihayî de vîyarnena.

Emîne Şenyaşar lajê xo reyde roşanê xo vernîyê Edlîyaya Rihayî de vîyarnena.

Emîne Şenyaşar lajê xo reyde roşanê xo vernîya edlîya de vîyarna. 14ê Hezîrane 2018î de qezaya Riha ya Pirsûsî de 2 laj û mêrdeyê Emîne Şenyaşar, hetê pawitox û merdimanê wekîlê AKPyî yê Rihayî yê Îbrahîm Halîl Yildizî ra ameyê qetilkerdiş. Lajê ci Ferît Şenyaşar zî bibi birîndar. Emîne Şenyaşar û lajê ci Ferît Şenyaşar 9ê Adare 2021î ra nat vernîyê Edlîyaya Rihayî de nobeta edeletî de yê. Emîne Şenyaşar û lajê ci Ferît Şenyaşar roja roşanî zî şîyê vernîyê edlîya.

Ferît Şenyaşarî va, “Ewro roşan o. Keyeyî ewro mêmanan reyde eleqadar benê, şonê keyeyê merdimanê xo, lew nanê pî û mayanê xo destî ra la dadîyêk roja verêne ya roşanî de vernîyê edlîyaye de ya. 2 lajê na dadîye neweşxane de qetil bîyê û yew lajê ci zî 4 serran ra nat hucre de yo. Keyeyê aye ameyo rijnayîş. Dadîye tebat nêkena û yena vernîyê edlîya. Ewro tornê ci yê yetimî ameyê lew nayo aye dest ra. Ê nêşkenê vajê çîyêk ma dest ra nîno. Sawcî ra heta Serekkomar her kes zano çi qewimîyayo. Seba ke no qetlîam  bi destê wekîlê partîya îqtîdare bîyo, kes vengê xo nêkeno. Wexto ke meşte na partîye ra kesêk bêro tîya, ê do na dadîye ra se vajê? Heta lajê ci yo ke hucre de yo meyero veradayîş, dadîye do tîya de bimana. Zulimkarî do binbikewê.”

Dayîka Emîne Şenyaşar va, “Ewro roşano la ma nêşkenê keye de ronişê. Ez bi tornanê xo û lajê xo ameya tîya. Lajê mi Fadil 4 serran ra nat hucreyêka yewkesine de maneno. Çira qetilkarî ceza nêgenê? Qeydê kamerayî yenê nimitiş. Wa hinî Fadilî veradê. Keyeyê mi ame qetilkerdiş. Keyeyê mi û tornê mi perişan bîyê. Serre û nîme ra nat vernîyê edlîya mi rê bîyo keye. Erdogan û cinîya ci Emîne nînan nêvînenê?”

MA / RIHA

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.