‘Generalê Qijkekî’ yê Apê Mûsayî Kalo mezela xo ser de ame yadkerdene

Kalo, serrgêra yewine ya wefatê xo de mezela xo ser de ame yadkerdene.

Serranê 90an de mîyanê şerî de rojnameyî hetê ‘generalanê qijkekan’ ê Apê Mûsayî ra ameyêne vilakerdiş. Nê generalanê qijkekan ê Apê Mûsayî ra yew zî Kalo(Yilmaz Yakût) bi. Kalo, serrgêra yewine ya mergê xo de mezelcayê Yenîkoyî de mezela xo ser de ame yadkerdene. Îdarekarê DFG, MKGP, MEBYA-DERî, xeylê rojnamegerî û keyeyê ci bîyê beşdarê yadkerdişî. Fotografê Kaloyî mezela ci ser o ameyê ronayene û seba şehîdanê çapemenîye vindertişê hurmetî ame kerdene.

‘Têpîya game nêeşte’

Îdarekarê DFGyî Hakki Boltanî yadkerdişî de qisey kerd û va, “Xebatê embaz Yilmazî her çîyî mojnenê ma. Zulm o ke Kaloyî rê ame kerdene, leşa ci de û cuya ci de xo dabi teber. Ma tena biewnê înan ra, ma eşkenê kitabê faşîzmî biwanê. Coka çapemenîya azade de xebatê Kaloyî her kesî rê nimuneyê muhîm ê. No nimune do çirey vîr ra meşêro. Cuya ey sey kitabê derse bî. Kaloyî çirey game têpîya nêeşte. Estbîyayîşê xo da xeberan ser. Eke ma bipersê û ma vajê generalanê qijkekan ê Apê Mûsayî ra o yo tewr verên kam bi? Ma eşkenê bi rehetî vajê ke Kalo bi. Ma xebatanê ey ver de bihurmet çewt benê. Ma do timûtim ey yad bikerê.”

‘Merdimêko durist bi’

Dima maya Kaloyî Mevlude Yakûte qisey kerd û va, “Merdimêko cîya bi. Cuya xo de xeylê zehmetîyî antê. Seba ke ez meqehirî qet mi ra nêvatêne. Vatêne ‘Ma ke kewtê na raye, ma ganî raya xo ra şorê’. Yilmaz merdimêko zaf durist bi. Waştêne wa her kes raya heqîqetî ra şoro. Zaf zulim dîbi la reyna zî xebatê xo ramitêne.”

Yadkerdiş, bi mezale ser o ronayîşê qerenfîlan ame qedîyayîş.

MA / DÎYARBEKIR