Hozan Dîyar: PDK îxanetî ra fek vera bido

Hemkarîya PDKyî ya bi dewleta tirke her roje yena nîqaşkerdene. Hozan Dîyarî derheqê babete de qisey kerd û venga şarê kurdî da.

Hunermend Hozan Dîyarî da zanayene ke PDK bi dewleta tirke hemkarîye keno û wina qisey kerd: “PDK hemkarîya dişmenanê kurdan keno. Ganî PDK îxanetî ra fek vera bido. Hunermend, roşnvîr, pêşmerge û şarê Başûrî ganî rayîr nêdê nê îxanetî.”

Hozan Dîyarî vat: “Ez sey welatperwerêk û hunermendêkê kurdî wazena bale bianca tehlukeyê vera qederê ma. Dewleta tirke Başûrê Kurdistanî de pê artêşa xo, MÎT û ajanan wazena ke kokê kurdan bîyara û destkewteyanê kurdan çin bikera. Dewleta tirke Başûr de bi desan baregehî nayî ro û Başûr îşxal kerdo. No seba şarê kurdî şerm a.

PDK hemkarîya dişmenanê kurdan keno. Ganî PDK îxanetî ra fek vera bido. Hunermend, roşnvîr, pêşmerge û şarê Başûrî ganî rayîr nêdê nê îxanetî. Dişmen û hemkarê ci kenê ke derban bidê gerîlayan ro. Gerîlayî seba pêro Kurdistanî têkoşîn kenê. Ganî ma verê îxanetî bigêrê.

PDK paştî nêdo gerîlayan zî wa rayîr nêdo ajanîye, dewleta tirke û artêşa tirke. Ê bi qederê ma kay kenê. Gerîlayî ewladê ma yê. PDK senî eşkeno vera gerîlayan dişmenî de hemkarîye bikero? Ma ney qebul nêkenê. No şer mabênê kurdan û dişmenan de yo. Şerê gerîlayan û dewleta tirke yo.

Ez venga pêro hunermend û roşnvîranê kurdan dana ke vera nê îxanetî vengê xo berz bikerê, bi tewirê kurdewarîyî îxanetî vindarnê û bê tesîr bikerê. Ma nêverdê ke wa çew pê qederê ma kay bikero.”

XWEBÛN