Îdareyê Xoserî: Ma vera îşxalî pîya xo ver bidê

Serrgêra hêrîşanê vera Efrînî de hetê Îdareyê Xoserî yê Mintiqaya Firatî ra malûmatêk ame dayene.

Îdareyê Xoserî yê Mintiqaya Firatî, serrgêra hêrîşanê vera Efrînî de malûmatêk da. Ame dîyar kerdiş ke, hetê Tirkîya û çeteyan ra seba ke demografî bêro vuranayene hêrîşî yenê kerdene. Malûmatî de ame vatiş ke, “Kurdê Efrînî raştê hende teda û zulmî yeno la reyna zî xo ver dano. Nê pêroyê kerdenî, bi destê grûbanê ke binê kontrole Tirkîya de yê yenê kerdene. Dewleta Tirke berpirsîyarê nê sûcan a. Dewleta Tirke hêzêka îşxalkar a û eynî wextî de Muqaveleyê Laheyî zî binpay kena. Goreyê muqaveleyî, Dewleta Tirke nêşkena cayanê îşxalkerdîyan de awanîyan birijna û dest bina erdî ser. Ma eşkera kenê ke, hetê Dewleta Tirke û çeteyanê ci ra Efrîn de qanûnê mîyannetewîyî û qanûnê Konseyê Ewleyîye yê NYyî 2254î ameyê binpaykerdiş.”

Şaranê Sûrîyeyî rê gazîye

Malûmatî de ame waştiş ke, ganî hêzê mîyannetewîyî berpirsîyarîya xo ca biyarê, sûcanê şerî û vurnayîşanê demografîkan bivindarnê. Şaranê Sûrîyeyî rê gazîye ameye kerdene û ame vatiş ke, “Ganî pêro şarî bibê yew û vera hêrîşanê îşxalkerdişî yê Dewleta Tirke xo ver bidê. Seba ke problemi çareser bibê, ganî pêro hetan reyde dîyalogî bêrê ramitene.”

MERKEZÊ XEBERAN