Îşkence ame qebulkerdiş

Walîtiya Amedî, bi malûmatêk qebul kerd ke domanê Y.D. yê 14 serrî rê îşkence ameyo kerdene û dîyar kerd ke komîserêk û 4 polîsî wezîfe ra ameyê dûrîvistiş.

21ê Adare roja Newroze de qezaya Amedî ya Licêyî de, domano bi nameme Y.D.(14) demo ke bi embazêkî xo yo 10 serrî reyde agêrayêne keye, polîsan o remnabi û îşkenceyo giran ci rê kerdibi. Dima derheqê babete de cigêrayîş dîyabi dest pêkerdene. Badê hetê Y.D.yî ra teşhîskerdişê polîsan, yewê înan komiser 5 polîsî gêrîyaybî binê çimî.

Hetê Walîtîya Amedî ra malûmat ame dayene û îşkence ame qebulkerdene. Malûmatî de ame dîyarkerdiş ke, Y.D. ameyo derbkerdiş, polîsê ke binê çimî de yê wezîfe ra ameyê dûrîvistiş û cigêrayîş do dewam bikero.

Se bibi?

21ê Adare de Licê de, domano bi nameyê Y.D. demo ke bi embazê xo yo 10 serrî reyde agêrayêne keye polîsan ê dabî vindertene û dabî înan ro. Dima polîsan embazê Y.D.yî yo 10 serrî veradabi û Y.D xo reyde berdibi. Polîsan, dest û linge Y.D.yî girê dabî û ci rê îşkence kerdibi. Polîsan bi îşkenceyan waştibi Y.D. vajo ez tirk a, bi kiştişî o tehtîd kerdibi û înan vatibi ‘kurdan rê nengan biçîne û Marşa Îstîklalî biwane’. Dima polîsanê îşcencekaran fek û destê Y.D. gire dabî û o eştibi kişta dereyî. Dewijêk o şewe erey dîbi û berdibi nêweşxane. Îşkenceyî ver beno ke Y.D. çimêkî xo vîndî bikero. Xebera îşkenceyî ke Ajansa Mezopotamyayî de weşanîyaybî ra dima hetê Serdozgerîya Licêyî ra derheqê mesele de cigêrayîşêk dîyabi dest pêkerdene.

XWEBÛN / AMED