Komîteya Festîvalê Munzirî: Ganî qedexeyî bêrê wedartiş

• Ganî qedexeyê dekewtişê bajarî bêrê wedartiş û komê muzîkî bieşkê bêrê bajar.

Hetê Walîtîya Dêrsimî ra tayê çalakîyê festîvalî ameybî qedexekerdiş. Komîteya tertîpkerdişî ya Festîvalê Munzirî derheqê qedexeyan de malûmatêk da.

Festîvalê Munzirî do mabênê 21-24ê Temûze de bêro viraştene. Tayê çalakîyê festîvalî hetê Walîtîye ra ameyê qedexekerdiş. Hetê Komîteya Tertipkerdişî ya Festîvalê Munzirî ra derheqê rewşe de malûmatêk ame dayene.

Malûmato nuştekî de Komîteya Festîvalî va, “Her rayîrî ser de cayê kontrolî ameyê ronayîş. No vernîyê azadîya sehahatkerdişî de astengîyêk o. Eşkera yo ke kerdenê serranê 90an yenê ramitene. Walîtîye wazena festîvalî bin ra qedexe bikera.”

Malûmatî de nê waştişî ameyê rêzkerdiş:

*Ganî pansîyonê wendekaran seba mêmanan akerde bimanê.

*Ganî stadyûmê bajarî seba konseran bêro akerdiş.

*Ganî qedexeyê dekewtişê bajarî bêrê wedartiş û komê muzîkî bieşkê bêrê bajar.

*Şarê ma bi keda xo Festîvalê Munzirî awan kerdo û wayîrê kultur û kamîya xo vejîyeno. Polîtîkayanê xo ra fek veradê û qedexeyan wedarê. Şarê ma wazeno bi aramî û azadîye bêro têhet û festîvalê xo pîroz bikero.

MA / DÊRSIM