‘Ma 2 serran de wendiş û nuştişê Kurdkî musna 7 hezar kesan

yekşem 15 gulanê 2022 - 11:18

  • Hemsereka Komeleya Cigêrayîşanê Kurdan Remzîye Alparslane va, “Kurdkî kuçeyan ra wedarîyaye.”

Hemsereka Komeleya Cigêrayîşanê Kurdan Remzîye Alparslane va, “Kurdkî kuçeyan ra wedarîyaye.”

Kovara Hawarî 15ê Gulane 1932yî de Şam de bi latînî dest bi weşana xo kerde. Kovare 57 hûmarî vejîyaye. Hawar hetê Celadet Elî Bedirxan û embazanê ey ra ame hedrekerdiş. 15ê Gulane 2006î ra nat sey ‘Roşanê Ziwanê Kurdkî’ yeno pîrozkerdiş. Roşanê Ziwanê Kurdkî de meseleyê ziwanî û çalakîyî vejîyenê ver. Komeleya Cigêrayîşanê Kurdan zî do Eyenyûrt û Kartalê Îstanbûlî de çalakîyan biviraza. 

‘Kovara Hawarî referansêka bingeyîn a’

Hemsereka Komeleya Cigêrayîşanê Kurdan Remzîye Alparslane va, “Kovara Hawarî tarîxê Kurdkî de wayîrê cayêkî bingeyîn a. Latîzekerdişê Kurmanckî de rolêko pîl kay kerdo. Hawar ewro zî ma rê referansêk o. Tarîxê weşanbîyayîşê Hawarî bîyo Roşanê Ziwanê Kurdkî. Na roje de ma wazenê şarê xo haydar bikerê, meseleyanê ziwanî qisey bikerê û xebatanê bingeyînan yad bikerê.”

‘Qiseykerdişê Kurdkî, kuçe û bajaran terikneno’

Remzîye Alparslane va, “Rewşa Zazakî, Kurmanckî ra hîna xirab a. Çend ma dest ra bêro ma muhîmîye danê Zazakî û ma kursan akenê. Ma wazenê Zazakî pay ra bimana. Çi heyf ke ma vînenê ke qiseykerdişê ziwanî kuçe û bajaran terikneno. Ma cehd kenê ke na rewşe başêr biba. 2 serran de ma wendiş û nuştişê Kurdkî musna 7 hezar kesan. Nika 10 sinifê ma yê domanan estê. Ma pêro şarê xo silaynenê çalakîyanê yo yê Roşanê Ziwanê Kurdkî.”

* Nuşteya Ferhat Yaşar, Gazete Duvar de veciya.

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.