‘Ma ganî vera asîmîlasyonî ziwanê xo qisey bikerê’

yekşem 22 gulanê 2022 - 16:24

  • Hemserekê Enstîtuya Kurdî ya Îstanbûlî Eyup Sûbaşiyî: Ma ganî vera hêrîşan hîna zêde wayîrê ziwan û kulturê xo bivejîyê. Roje roj a paştîdayîşî ya.

Enstîtuya Kurdî ya Îstanbûlî, bi wesîleyê serrgêra xo çalakîyêk viraşte.

Enstîtuya Kurdî ya Îstanbûlî bi wesîleleyê serrgêra awanbîyayîşê xo de çalakîyêk viraşte. Enstîtu emser 30 serrîya xo pîroz kena. Çalakîye de zana Farqînî, Miraz Ronî, Însîyatîfê Dayîkanê Haştîye, hemserekê enstitüye, xeylê dezgeyan ra temsîlkarî û henermendanê Merkezê Kulturî yê Mezopotamyayî cayê xo girewt. 

‘Ma wayîrê ziwan û kulturê xo bivejîyê’

Hemserekê Enstîtuye Eyup Sûbaşiyî va, “Demêko derg ra nat vera kultur û ziwanê Kurdan tehdayî benê. Vera Kurdkî vindertiş bîyo polîtîkayê dewlete. Wazenê xoverdayîşê Kurdan çin bikerê. Ma ganî vera nê hêrîşan hîna zêde wayîrê ziwan û kulturê xo bivejîyê. Roje roj a paştîdayîşî ya.”

‘Asîmîlasyon dewam keno’

Eyup Sûbaşiyî ra dima nuştox Miraz Ronî qisey kerd û va, “Heta ke Kurmancî rasaye formêk xeylê rayîr gêrîya. Enstîtu xebata ziwanî da dast pêkerdiş. Na xebate wextêk ra dima fêkîyê xo dayê. Enstîtu raşta zî xebatê xeylê başî kerdê. Çi heyf ke xeylê dezge û komeleyî ameyê padayîş û qeyyûmî ameyê ser. Vera nê hêrîşan ganî Kurdî xo bipawê û wayîrê ziwanê xo bivejîyê.”

Talukeyê çinbîyayîşê ziwanî

Ziwanzan Zana Farqînîyî va, “Xeylê dezgeyî xoser o xebata ziwanî kenê. No qîm nêkeno û ganî ma pîya bixebitîyê. Ronayîşê cumhûrîyetî ra nat kultur û ziwanê Kurdan binê asîmîlasyonê giranî de yê. 30 serranê peyênan de xeylê xebatê ziwanî benê la reyna zî ziwan taluke de yo. Ganî merdim biewno, hela ziwan hetê domanan ra yeno qiseykerdiş yan ney. Ziwano ke hetê doman û ciwanan ra qisey mebo binê talukeyî de yo. Ma ganî vera na rewşe xo ver bidê. Ma ganî her ca de Kurdkî qisey bikerê. Rayîrê pawitişî yo tewr baş no yo.”

Qiseykerdişan ra dima sertîfîkayê wendekan ameyê dayene. Dima dengbêjan û henermendan deyîrê xo vatê û çalakîye bi keyf û şayîye qedîyaye.

MA / ÎSTANBÛL

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.