- Baroyê Çewlîgî derheqê qetilkerdişê pezkovîyan de eşkerayîyêke daye û îfade kerd ke ê îhaleyê seba qetilkerdişê pezkovîyan qebul nêkenê. Baroyî seba betalkerdişê bire muracat kerd.
Wezaretê Zîret û Daristanan ê Tirkîya 3ê temmuze de pê îhaleyêk destûr dabi ke Çewlîg de 14 pezkovîyî û tay heywanê bînî yê koyî bêrê qetilkerdene. Vera bira wezaretî nêrazîbîyayîşî nêqedîyenê.
Baroyê Çewlîgî derheqê mesele de eşkerayîyêke daye û bi hawayêkê xurtî îfade kerd ke bira Wezaretî qanûnî nîya.
Eşkerayîya Baroyê Çewlîgî de nê çîyî ameyî vatene: ''Nê heywanî hetê Peymana Bernî ya Ewropa ra yenê pawitene. Seydwanîya nê heywanan do bikera ke neslê înan çin bina. Ma qebul nêkenê ke pê îhaleyêkî neslê înan do çin bibo. No îhale bêexlaq û bêqanûnî yo. Ma sena batalkerdişê îhaleyî 27ê temmuze de muracat kerd û ma do heta peynî seba naye têkoşîn bikerê. Ma sere de şarê Çewlîgî venga pêro hemwelatîyanê hîsgeran danê ke seba batalkerdişê îhaleyî vengê xo biresnê selahîyetdaran û paştî bidê pawitoxanê xoza û dormeyî.''
Hetê bînî ra Wekîlê HDPyî yê Çewlîgî Erdal Aydemîrî zî hesabê xo yê twitterî ser o venga şarê Çewlîgî da. Erdal Aydemîrî vat: ''Ame zanayene ke seba qetilkerdişê 14 pezkovîyan Çewlîg de destûr ame dayene. Şarê Çewlîgî vera nê qirkerdişî do bêveng nêmano. Bire ganî cade bêra batalkerdene.''
ANF
parvê bike
Nûçeyên ku dikare bala we bikşîne
