Bajaranê Serhedî de emser vewre nêvaraya. Serekê ÇEV-DERî Alî kalçikî dîyar kerd ke no yew felaket o û hîşyayîya wuşkayî kerde.
Bajaranê mintiqaya Serhedî de emser vewre nêvaraya. Her zimistan koyan û gêlîyan de 2-3 metreyî vewre varayêne. La emser tena koyanê berzan vewre girewte. Hetê pisporan ra ame dîyarkerdiş ke, eke nîyo şêro hamnan do wuşkayîya girane biqewimîya.
Serekê ÇEV-DERrî yê Wanî Alî Kalçikî dîyar kerd ke, emser koyan de zî vewre kêm varaya û va, “No seba ma felaketêk o. Hetê zanyaran ra zî hişyayîyî yenê kerdene. Eke tedbîrî meyerê girewtene, felakete pîlî do biqewimîyê. Eke nîya şêro, qet yew hamnan û zimistanî do sey verî mevîyerê. Gola Wanî panc km ancîyaya. Seba ke hewzaya girewtîya, no talukeyêko pîl o. Cayê awî yenê dekerdiş û ser o awanîyî yenê viraştiş. Bi polîtîkayanê xeletan, çimeyê awe yê ke estê yenê çinkerdiş.”
Ocaxê madenî û Hesî
Kalçikî va, “Çinbîyayîşê vewre ver talukeyêko pîl esto. Çimeyê awe yê mintiqaya ma vewr a. Vewre mevara, çimeyê awe yê binê erdî û serê erdî do ziwa bê. Seba rantî ocaxî û Hesî yenê viraştene û înan ver awa pake bena gemarin û qedîyena. Awa ma germbîyayîşê globali û polîtîkayanê xeletan ver yena çinkerdiş û mintiqaya ma ver bi felaketêk şona.”
‘Renc û weyekerdişê heywanan do biqedîyê’
Kalçikî dîyar kerd ke, cemedê Koyê Agirê û Cîloyî bileze helîyenê û va, “Awa dereyanê ma hema-hema ziwa bîya. Kurdistan de şar bi renc û weyekerdişê heywanan debara xo keno. Nê her diyî çimeyê cuye yê. Germbîyayîşê globali ver do nê biqedîyê. Seba ke verê nînan bêrê girewtiş, ganî herinda sotemenîyanê folîlan sotemenî yê ke yenê newekerdiş bêrê gurînayîş. Ganî warê keskî bêrê zêdkerdiş. Eke nêbo, ma do mezela xo bi destê xo bikinê.”
MA / WAN
parvê bike
Nûçeyên ku dikare bala we bikşîne
