No weçînayiş do mabênê şerwaştox û haştîwaştoxan de bibo

Hemverfeka Partîya Çep a Keske Çîgdem Kiliçgun Uçare Xîzan de dîyar kerd ke, no weçînayîş do mabênê şerwaştox û haştîwaştoxanê Kurdan de bibo.

Partîya Çep a Keske xebatanê xo rê weçînayîşî ramnena. Bajar bi bajar, dewe bi dewe xebatî yenê kerdene. 

Bedlîs de zî buroyê weçînayîşî ameyê akerdene û xeylê kes akerdişan de ame têhet. Hemserekê DBPyî Keskîn Bayindir û Hemverfeka Partîya Çep a Keske û namzedî şarî reyde ameyê têhet.

‘Wayîrê partîya xo bivejîyê’

Hemserekê Pêroyî yê DBPyî Keskîn Bayindirî va, “Ma do weçînayîşî de îqtîdarî binbifînê. Tîya de politikaya taybete yena ramitene û ciwananê ma dûrî fînenê. Hema çend rojan ra ver ciwanêk întîxar kerd. Ez veng a ciwanan dana; wa nê polîtîkayanê gemarinan bivînê, wayîrê xo û partîya xo bivejîyê.”

‘Rejîmê tek merdimî do vîndî bikero’

Hemverfeka Partîya Çep a Keske Çîgdem Kiliçgun Uçare va, “Bedlîs hem seba hereketê ma, hem seba Kurdistanî bajarêko zaf muhîm o. Bedlîs sey berê Kurdistanî yeno tarîfkerdiş. Wa AKP rê bibo berê vejîyayîşî. No weçînayîş do mabênê şerwaştoxan û haştîwaştowan de bibo. No weçînayîş do mabênê tecrîdkaran û ma de bibo. Weçînayîş do mabênê komel û îqtîdarî de bibo. Rejîmê tek merdimi do vîndî bikero.”

MA / BEDLÎS