Platformê Gelîya Perrîye: Şima nêşkenê vîrameyîş û pîrozanê ma birijnê

Wazenê Gelîya Perrîye ya Çewlîgî de ocaxa madenî akerê û seba viraştişê madenî raporê ÇEDî ameyo dayene.

Gelîya Perrîye Bakurê Çewlîgî de bi dewlemendîya xozaya xo şar û gandaranê mintiqa verare kena. Dewlete wazena bi ocaxanê madenî xozaya Gelîya Perrîye bixeripna. Seba ke ocaxa madenî bêra akerdiş, raporê ÇEDî ameyo dayene.

Bi rayberîya Platformê Derûdorî yê Gelîya Perrîye Îstanbûl Kadikoy de mîtîngêk virazîya û qerar ame protestokerdiş.

Platformî malûmatê xo de va, “Cayê projeye de berhemê tarîxîyî estê û nê berhemî tescîlkerde yê. Mintiqaye de tewirê endemîkî estê. Reyna gelîye de peskovîyî, pisîngê koyîyî, zerencî û xeylê heywanê bînî estê. Do bi na projeye çimeyê awa şimitişê gemar bibê. Gelîya Perrîye halîne teyr û mîlçikan a. Reyna na mintiqade kare hingêmênî beno û eke ocaxî abîbê do hingî zerar bivînê. Ganî projeya madenî cade bêra betalkerdiş. 20 serranê peyênan de Çewlîg de bi madenan û HESan xozaye ameya talankerdiş. Ma nêwazenê xozaya ma û erjê ma çin bibê. Uca de mezelê ma, pîrozê ma, vîrameyîşê ma û xîyalê ma estê. Şima nêşkenê înan birijnê. Ma do çirey destûr medê.”

PÎRHA / ÎSTANBÛL