PZK: Dewlete Kurdan rê û ziwanê înan rê heqeret kena

çarşem 6 tîrmehê 2022 - 16:34

  • Xoverdayîşê ziwanî yê Kurdan do heta ke Kurdkî bibo ziwano resmî û ziwanê perwerdeyî dewam bikero.

Kontenjanê mamosteyan ameyê eşkerakerdiş û seba Kurdkî do tena 3 mamosteyî bêrê tayînkerdiş.

Hetê Wezaretîya Perwerdeyî ra 3yê Temûze de serrnameyê tayînkerdişê 20 hezar mamosteyan û kontenjanê beşan ameyê eşkerakerdiş. Goreyê malûmatanê wezarete, mamosteteyî do 1ê Êlule de bêrê tayînkerdiş. Seba mamostetîya Kurdkî tena 3 kontenjanî ameyê abirnayîş. La eqsê mamosteyanê Kurdkî do bi seyan mamosteyê Erebkî, Almankî û Îngîlîzkî bêrê tayînkerdiş.

Platformê Ziwanê Kurdkî(PZK) derheqê meseleye de malûmatêko nuştekî hedre kerd û kerdena wezaretîye ameye şermezarkerdiş. Platformî malûmatê xo de bale ante qedexeyanê çalakîyanê Kurdkî zî û platformî va nîyetê dewlete Kurdan rê û ziwanê înan rê heqeretkerdiş o.

Malûmatê platformî bi temamî wina yo:

‘Kurdan se serran ra nat binê her şertan de ziwanê xo û kulturê xo pawito û ardo rasnayo heta ewro. Dewleta Tirkîya çirey ziwanî sey dewlemendîye nêdîya û seba ke nê ziwanî biqedîyê kede daya. Bi politikaya dewlete ziwanê Tirkîya û Kurdistanî yan qedîyayê yan zî ver bi qedîyayîşî de yê. Vera Kurdkî zî nê hêrîşî bîyê û polîtîkayê asîmîlasyonî ameyê ramitene. La xurtîya Kurdkî û Kurdan ver ziwan û kulturê ma pay ra mendê. Ewro zî vera ziwanê Kurdan û kulturê Kurdan hêrîşî dewam kenê.

Nîyetê înan vera Kurdan o

Averşîyayîşan û mecbûrîyetan ver dewlete mecbûre mende ke 2012î de derheqê Kurdkî de çend gaman bierza. TRT 6 ame akerdene, tayê zaningehan de beşê Kurdkî abîyê û dersa Kurdkî mektebo mîyanênî de bîye dersa weçînitî.

La mîyanê serran de vejîya meydan ke, nîyetê muqtedîran û dewlete averberdişê û pawitişê Kurdkî nîyo. Înan waşto raya pêroyîye ya zereyî û raya pêroyîye ya teberî rê reklamê xo bikerê ke seba Kurdan nînan kenê.

Eke wina nêbîyêne înan zaningehanê xo de lehçeyanê ma yê Kurmanckî û Kirmanckî sey ziwananê 2 miletan nêdayêne nîşandayîş, seba mamostetîya Kurdkî serre de 1 yan 2 kesî nêameyêne tayînkerdiş, muzîkê Kurdkî kuçeyan de raştê hêrîşan nêameyêne, konser û tîyatroyî nêameyêne qedexekerdiş, tabelayê Kurdkî nêaçarîyayêne Tirkî û nameyê cayanê ma nêbîyêne Tirkî.

Dirîtîya Dewlete

Erdê nê welatî ser de 30 mîlyon Kurdî cuwîyenê, Kurdî zî sey pêro welatîyan bace danê dewlete, senî ke seba Tirkî îmkanî peyda benê, ganî seba ziwanê Kurdkî û ziwananê bînan zî bêrê peydakerdiş. No heqêk o û lutifê kesêkî nîyo.

Hetêk ra propagandayê xo kenê vanê ma Kurdkî ser ra qedexeyî wedartê, hetêk ra zî vera ziwanê Kurdkî hêrîşan kenê. Na dirîtîyêka zaf pîl a. Ma naye qebûl nêkenê û şermezar kenê.

Xoverdayîşê ziwanî yê Kurdan do heta ke Kurdkî bibo ziwano resmî û ziwanê perwerdeyî dewam bikero.

Kurdan heta ewro senî ziwanê xo û kulturê xo pawito û wayîr vejîyayê do ewro û meşte zî wayîrê ziwan û kulturê xo bivejîyê, bicuwîyê û bicuyînê.”

XWEBÛN 
 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.