Şerîf: Ganî vernîyê îşxal û hêrîşanê Tirkîya bêro girewtiş

• Parlamenter Şerîfî: Ganî vernîyê îşxal û hêrîşanê Tirkîya bêro girewtiş.

OMER AKIN / MA

Parlamenterê PDKyî Çîya Şerîfî va, “Ameyo îspatkerdiş ke hêrîşa Zaxoyî hetê Tirkîya ra ameya kerdene. Ganî vernîyê îşxal û hêrîşanê Tirkîya bêro girewtiş.”

Tirkîya seyrangehê dewa Zaxoyî ya Perexî bomba kerdibî. Na hêrîşe de 9 sîvîlî merdibî. Mîyanê înan de gerguşêk zî estibi. Hêrîşa Tirkîya hetê şarî protesto bena. Parlamentoya Iraqî zî bi rojaneya qetlîamî ameye pêser. Parlamenterê PDKyî û endamê Komîsyonê Têkilîyanê Teberî yê Parlamentoya Kurdistanî Çîya Şerîfî va hêrîşe qereqolê Tirkîya yê Kîrya Reşî ra ame kerdene.

Sînorê Tirkîya rê 1,5 Km dûrî yo

Çîya Şerîfî va, “Cayo ke ameyo bombakerdiş, cayêko turîstîk o û sînorê Tirkîya ra 1,5 km dûrî yo. Nêzdîyê ucayî de qereqolêkî Tirkîya esto. Dewê mintiqaye zaf reye ameyê bombakerdiş û ameyê vengkerdiş. Dewa Perexî ya ke ameya bombakerdiş hema şênî ya. Tirkîya demêkî dergi ra nat her cayê mintiqaye bomba kena. Seba ke şarî bitersna nê bombayî timûtim erzîyenê. Tirkîya verî cû koyî vêşnayêne la nika hêrîşê xo zêdînayê û mintiqayanê sîvîlan bomba kena. Zaxoyî de zî bi hêrîşa Tirkîya 9 kesî merdê. No raşta zî wehşetêk o. Ganî mesela bêra zêlalkerdiş û hêrîşî cade bêrê vindarnayîş.”

Hêrîşe qereqolê Kîrya Reşî ra ameye kerdene

Şerîfî va, “Dema mi zî Perexî ra nêzdî ya. Wexto ke bombayî erzîyayê, şarî dîyo ke ça ra ameyê. Xora qereqolê Tirkîya uca ra zaf nêzdî yo. Netîceya cigêrayîşan de ame tespîtkerdiş ke hêrîşe hetê Tirkîya ra ameya kerdene. Heta nameyê qereqolî zî ameyo eşkerakerdiş. Hêrîşa Tirkîya qereqolê Kîrya Reşî ra ameya kerdene. Tîya zî mintiqayêka Şirnexî ya û mîyanê sînoranê kurdistanê Federalî de manena. A roje xeylê cayê bînî zî hetê Tirkîya ra ameyê bombakerdiş.”

‘Ganî vernîyê îşxalê Tirkîya bêro girewtiş’

Derheqê hêrîşanê Tirkîya de Çîya Şerîfî va, “Ma hêrîşanê verênan de zî Hukmatê Bexdatî ra waşt wa vernîyê nê hêrîşan bêro girewtiş. La Hukmatê Bexdatî goş pa nêvist û çîyêk nêkerd. Hêrîşa Zaxoyî ra dima hukmato merkezî vengê xo kerd. Na hêrîşe hetê hukmatanê Bexdat û Hewlêrî ra ameye şermezarkerdiş. Ma Hukmatê Bexdatî ra zî va ganî vernîyê îşxalê Tirkîya bêro girewtiş. Ganî hêzê mîyanneteweyî yê zî seba vindarnayîşê hêrîşanê Tirkîya gaman bierzê. Ma wazenê prosesêkî haştîye bêro dest pêkerdiş. Ganî mîyanê PKK û Tirkîya de dîalogî dest pêbibê. Ma do sey Hukmatê Kurdistanê Federalî paştî bidê nê prosesî. Ma şer nêwazenê.”

‘Ma hêzêkî îşxalkarî nêwazenî’

       Parlamenterê PDKyî Çîya Şerîfî peynî de va, “Tirkîya 1988î de Hukmatê Iraqî de muqaveleyêk viraşt û kewte erdê Iraqî. La ma nêwazenê mintiqaya Kurdistanî hetê hêzêkî ra îşxal bibo. Erdê Kurdistanî, yê şarê Kurdistanî yo. Ma nêwazenê Tirkîya tîya de şerê xo biramna. Ma na hêrîşe şermezar kenê. No terorîzm o.”