Wa sehaya hewayî ya Bakurê Sûrîyeyî bêra padayîş

yekşem 31 tîrmehê 2022 - 16:53

  • Parlamenteranê Fransizan: Şerwaştişê Erdoganî Rojhelatê Mîyanênî û Ewrûpayî tehdît keno. Ganî sehaya hewayî ya Bakûrê Sûrîyeyî bêro padayîş û Îdareyo Xoser bêro şinasnayîş.

Bi rayberîya Endama Partîya Komunîst a Fransayî Laurance Cohen, 102 parlamentanê partîyanê cîyayan ê Fransayî, gef û îşxalanê Tirkîya yê vera Bakûr û Rojhelatê Sûrîyeyî ser o deklarasyonêk hedre kerd. Senator û parlamenteranê Fransizan dîyar kerd ke, Rusya senî ke Ukrayna de şer veto, dima Erdoganî rewşa dinyaye û bêdengîya çapemenîya mîyanneteweyî ra paştî geno û wazeno hêrîşa Kurdanê Bakurê Sûrîyeyî bikero.

Parlamenteran va mintiqayanê Îdareyê Xoserî yê Bakur û Rojhelatê Sûrîyeyî de şarî pêro pîya cuwîyenê û wazenê sîstemêko demokratîk, femînîst û ekolojîk awan bikerê. Seba ke haştîyeka mayînde awane biba, şarî pêro pîya têgêrenê.

‘Ganî welatê Rojawanî vera sûcanê şerî bêveng mebê’

Parlamenteranê Fransizan va, “Ganî hinî welatê Rowawanî vera sûcanê şerî û binpaykerdişanê artêşê Tirkîya bêveng memanê. PKK û YPGyî vera Daîşî xo ver da û no xoverdayîş pêro dinya de erjaye ame qebulkerdiş. Na rewşe na pêroyînan eleqadar kena. Ganî ma destûr medê ke Erdogan reyna hêrîşa dosnanê ma yê Kurdan bikero. Ganî ma xo vîra mekerê ke mintiqaya Îdareyê Xoserî yê Bakur û Rojhelatê Sûrîyeyî de bi hezaran cîhadîstî ameyê girewtiş. Eke hêrîşa Tirkîya û îşxalê ci bêro qebûlkerdiş, do ewlehîya mintiqa bikewa taluke û no do seba Ewrûpayî bibo talukeyêko pîl.”

‘Ganî statuyê Îdareyê Xoserî bêro şinasnayîş’

Deklarasyonî de ame vatiş ke, “Ma sey parlamenteranê fikranê cîyayan ê Fransayî, polîtîkayê şerî yê Erdoganî şermezar kenê û berpirsîyaranê welatanê Ewrûpayî ra vanê wa haydar bê. Ganî sehaya hewayî ya Bakurê sûrîyeyî bêra padayîş. Ma veng a Yewîtîya Ewrûpayî û Neteweyanê Yewbîyayîyan rê kenê ke, wa prosedurê elzemî bêrê dest pêkerdiş û seba ke çareserîya mayînde bêra awankerdiş, ganî statuyê Îdareyê Xoserî yê Bakur û Rojhelatê Sûrîyeyî asta mîyanneteweyî de bêro şinasnayîş.”

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.