4 serrî verî cû bar kerd la kilamê ci cuwîyenê

ZEYNEP DURGUT / MA / ŞIRNEX

Dengbêj Fadil Cizîrî 4 serrî verî cû mîyanê ma ra bar kerd.

Dengbêjo pîl Fadil Cizîrî 4 serrî verî cû mîyanê ma ra bar kerd. Fadil Cizîrî 1962yî de Şirnex Girkê Emoyî de ame dinya. Dengbêjîye maya xo ya dengbêje ra musa. Ey gan dayê xeylê payîzokan. Beledîya ra bi teqawit û reyna agêra dengbêjîya xo.

Şerîkê Şakiroyî

Fadil Cizîrîyî nêweşîya parkînsonî ver serranê xo yê peyênan de dengbêjîye ra dûrî kewtibi. Yew lajê ey qezaya trafîkî de merd û yew lajê ci zî şerê bajaran de ame kiştiş. Înan ver nêweşîya ci hîna bîye girane. Sey şahê dengbêjan Şakiroyî, ey zî bêwayîrtî û tenayîye ver gerreyî kerdê. Malûmatê xo yê pêyênî de vatibi, “Şakiro zî bêkesîye ra nêmerd? Kes wayîrê dengbêjan nêvejîyeno”. Dengbêj Fadil Cizîrî 25ê Temûze 2018î de mîyanê ma ra bar kerd.

Dengbêjîye maya xo ra musayê

Birayê Fadil Cizîrî dengbêj Seyît Mehmet Ergulî va, “Ma dengbêjîye maya xo ra musayê. Maya mi xeylê kilamî musnayê ma. Maya mi şerm kerdêne mîyanê şarî de kilaman vaja. Fadilî wexto ke dengbêjîye musa, xeylê tewiran de kilamî vatê. Ekserî payîzok, lawik û giranîyî vatê. Mintiqaya ma de kes qasê ey nêşkayêne payîzokan vajo. Fadilî dengbêjîye ra zaf hes kerdêne. Ma pîya zî xeylê kilamî vatê. Mîyanê ma ra bar kerd şi la kilamê ci mîyanê ma de cuwîyenê. Ez do sey maya xo û Fadilî  kulturê dengbêjîye biramnî.”