Komeleya Nefelî de kargehî dest pêkerdê

• Komeleya Kultur û Hunerî ya Nefelî startê kargehanê xo da.

CEMÎL UGUR / MA / MERSÎN

Komeleya Kultur û Hunerî ya Nefelî startê kargehanê xo da.

Komeleya Nefelî bi paştîdayîşê hunermendanê Kurdan Mersîn de ameye ronayene. Komele 10ê Gulane de akerdişê xo îlan kerdibî. Nika zî komeleye de kargehî ameyê destpêkerdiş. 

Hunerê ziwanê dayîke

Endamanê komeleye ra Cejna Sarûhan vate, “Seba ke ma bieşkê kulturê xo ser o xebatan bikerê û kulturê xo aver de berê ma komeleya xo rona. Ma do her wareyî de xebatanê xo biramnê. Bajar de merkezê hunerî estê la qîm nêkenê. Ma wazenê domanî bi ziwanê dayîke xebatanê hunerî bikerê. Xeylê domanî zî nêşkenê xo birasnê xebatanê hunerî. Coka ma zî kargehê domanan akerd û muraceatî zî dewam kenê.”

Kulturê dengbêjîye

Sarûhan vate, “Ma nika kargehanê tembûr, erbane û yê domanan danê. Ma do kargehanê bînan zî bide dest pêkerdiş. Ma 15ê Gulane de bernameyê dengbêjan viraştibi. Nika yeno waştiş ke ma reyna bikerê. Ma do kulturê dengbêjîye ser o xebatan û bernameyan hedre bikerê.”