Dengbêjê Şengalî Xidir Feqîrî 13 serrî verî cû ma ra xatir waşt

ÎBRAHÎM ÊZIDÎ / ROJNEWS / ŞENGAL

Hekeyê koyê Şengalî Xidir Feqîr xizmetkarê komela xo bi.

Dengbejê Şengalî Xidir Feqîrî 13 serrî verî cû ma ra xatir waşt. Nameyê ci Xidir Xwedêda yo la sey Xidir Feqîrî yeno şinasnayîş. Koyê Şengalî de estûnêka muzîkê Kurdkî bi. Waştêne folklorê Şengalî aver de bero û komela xo rê xizmet bikero. 

Dengbêj Xidir Feqîr 1950î de Gêlîya Kesrêyî ya Şengalî de ame dinya. Sebebanê cîyayan ver nêeşka biwano û dest bi deyîrvatişan kerd. 500 deyîrê folklorîkî hefîzayê ey de bîyê. Bê dêyîranê folklorîkan, ey bi xo zî deyîrî viraştê. Deyîra ‘Xezalê’ ya namdare înan ra yew a. Bi vengê Xidir Feqîrî yê zelalî şayîyî raşta zî bîyêne şayî. 29ê Hezîrane 2009î de ey ma ra xatir waşt. Cinazaya ey, serê erdê pîrozî de Mezelcayê Şeraefedînî yê koyê Şengalî de ameye wedartene.