Baxçeyê Hewselî û Sûrî gêrîyayê ‘Lîsteya Mîrasî ya ke Binê Talukeyî de ya’

Sûrê Amedî û Baxçeyê Hewselî yê ke bi xebatanê hukmat û qeyûman ameyê texrîbkerdiş hetê UNESCOyî ra gêrîyayê ‘Lîsteya Mîrasî ya ke Binê Talukeyî de ya’.

Sûrê Amedî û Baxçeyê Hewselî yê ke Lîsteya Mîrasê ya Kulturê Dinyaye de bî hetê UNESCOyî ra gêrîyayê ‘Lîsteya Mîrasê ya ke Binê Talukeyî de ya’. Wextê şerê bajaran de Sûr xeylê ame texrîbkediş û bi destê ‘îmarî’ awanîyê tarîxîyî ameyê rijnayene û herinda îna de awanîyê betonarmeyî virazîyayê. Hetê UNESCOyî ra Sûr de cigêrayîşî ameyê kerdene û derheqê Sûran û Baxçeyanê Hewselî de raporêk ame hedrekerdiş. Rapor de bale ancîyaye texrîbkerdişan ser û nê cayî gêrîyayê Lîsteya Mîrasî ya ke Binê Talukeyî de ya.

No qerar hema sey taslakî yo û do 9ê Êlule de Kombîyayîşê Merkezê Kulturîyî yê Rîyadî de bêro zelalkerdiş.

Mudira Verêne ya Muzeya Amedî Nevîn Soyukaya derheqê qerarî de nê çîyî pare kerdê: “Ez xemgîn a! Hende texrîbat û rijnayîşî ra dima do xora nîya bibîyêne. Mîyanê Sûrî bi plankerde û sîstematîk ame çinkerdene. Sûrî û Baxçeyê Hewselî yê ke Lîsteya Mîrasî ya Dinya de bî hetê UNESCOYî ra gêrîyayê Lîsteya Mîrasî ya ke Binê Talukeyî de ya.”

MA / AMED