Chomskyî ra waştişê cigêrayîşê gurînayîşê çekanê kîmyewîyan

• Fîlozofo namdar Noam Chomskyî vera çekanê kîmyewîyan komelo mîyannetewî rê gazîya têgêrayîşî kerde.

Tirkîya vera HPGyîjan çekê kîmyewîyî gurînayê û vera nê hêrîşan çalakîyî yenê kerdene. Fîlozof û ziwannaso namdar Noam Chomskyî derheqê meseleye de Medyahaberî rê qisey kerdo. Chomskyî dîyar kerd ke ganî îddîayan ser o cigêrayîşî bêrê kerdene û hetetêko xoser bêro awankerdene.

Derheqê polîtîkayanê şerî yê Tirkîya de Chomskyî va, “Hetê hukmatê Tirkan ra vera Kurdan zaf zulmî ameyê kerdene. Serranê 90an de vera Kurdan sûcê zaf giranî ameyê kerdene. Bi hezaran Kurdî ameyê qetilkerdiş û bi hezaran kesî zî bîyê multecî. Dewî ameyê vêşnayîş û tewir-tewir îşkenceyî ameyê kerdene.”

Ganî Neteweyê Yewbîyayeyî têbigêrê

Noam CHhomskyî va, “Kurdistan de nika zî bi kîmyewîyan wehşet yeno kerdene. Hetê hukmatê Tirkîya ra Kurdistan de xeylê zulmî ameyê kerdene. Coka îddîaya gurînayîşê kîmyewîyan eşkena raşte ba. Destê mi de delil çin o la IPPNW sazîyêka ewle ya. Ronayoxê ci zî embazêkî min o baş o. Ganî seba cigêrayîşan heyetêko xoser bêro erşawitiş. Na mesele ganî şêra Neteweyanê Yewbîyayîyan û ganî ê zî vera nê îddîayan têbigêrê.”

Hukmatê Swêdî eşkeno rayberîye bikero

Chomskyî va, “Îddîayî zaf cidî yê. Doktoranê IPPNWyî Xelata Haştîye ya Noelî girewta û endamê sazîyêka ewle yê. Coka na rewşe seba cigêrayîşan zemînêko meşrû awan keno. Beno ke tayê hukmatê netewî biwazê nê karî de rayberîye bikerê. Beno ke Hukmatê Swêdî yo ke xelata haştîye dabî IPPNWyî eşkeno rayberîye bikero.”

‘Sewnîna delîlan rê îhtîyacî çin a’

Dewamê qiseykerdişê xo de Chomskyî va, “Seba ke tehdayê Hukmatê Tirkîya bêrê famkerdene, sewbîna deîlan rê îhtîyacî çin a. Ganî nê îddîayî hetê merdiman ra bêrê protestokerdiş. Nê protestoyî seba ke bibandor bê, ganî hetê sazîyanê mîyannetewîyan û dewletan ra bêrê kerdene. Ez eşkena protesto bikerê la no do zaf tesîrdar mebo. Goreyê mi îxtîmalo tewr baş, ganî dewletêk, beno ke no Swêd bo ganî muraceatê NYyî bikero û biwazo ke nê îddîayan ser o cigêrayîşî bêrê kerdene.”

Rojnamegeranê Kurdan rê mesajê paştîdayîşî

Chomskyî seba Şebnem Korur Fîncancî û 9 rojnamegeranê Kurdan mesajê paştîdayîşî da û va, “Ma paştî danê înan. Seba ke ê nê zulim û zordarîye ra bixelisîye, çi destê ma ra bêro ma do bikerê. Hêzdar bibê. Bizanê ke xeylê kesî hurmet mojnenê şima û seba şima çi destê înan ra yeno kenê.”

NAVENDA NÛÇEYAN