Ganî vera kîmyewîyan tora paştîdayîşî bêra awankerdiş

• Hemsereka KURD-AKADî Dersîm Dagdevîrene va, “Seba tehdaye ganî paştîdayîşo mîuannetewî bêro awankerdiş. Xeylê wezîfeyî kewenê heqperestan û doktoran ser.”

RUKÎYE ADIGUZEL / MA / ÎSTANBÛL

Tirkîya 6 aşmî ra nat mintiqayanê Zap, Avaşîn û Metîna de hêrîşanê xo ramnena. Hêrîşan de çekanê kîmyewîyan ver tewr kêmî 44 endamê HPG û YJA-Starî merdê. Dîmenê 2 şervanan amebi weşanayene. Sereka TTByî Şebnem Korur Fîncanci malamatanê xo ver û rojnamegerî zî xeberanê kîmyewîyan ver ameyê girewtene. Bêvengîya OPCWyî û sazgeyanê bînan dewam kena. Bajaranê Ewrûpa de xeylê wextî ra nat protestoyî yenê kerdene. Hemsereka KURD-AKADî Dersîm Dagdevîren, derheqê gurînayîşê kîmyewîyan de erjnayîşî kerdê.

‘Çareyo peyên kîmyewî yê’

Dersîm Dagdevîrene va, “Gurînayîşê kîmyewîyan qedexe yo û sûcê şerî yo. Tirkîya sey ‘çareyê peyênî’ mintiqa de kîmyewîyan gurînena. Kesê ke vera kîmyewîyan malûmatî dayê, sey ‘terorîst’ ameyê îlankerdiş. Hetê îqtîdarî ra TTB hedef gêrîyeno. Wazenê vengê TTByî bibirnê û padayîşê ci rê mehneyan gêrenê. Mamosta Şebnem pisporê nê karî ya û warê mîyannetewî de îtibarê ci esto. Wazenê vengê aye bibirnê û serê sûcê xo padê.”

Bêvengîya OPCWyî

Dagdevîrene va, “Tirkîya endamê OPCW, NATO û Konserê Ewrûpayî ya. Nê cayî nêwazenê dewletê ke kîmyewîyan gurînenê mîyanê înan de ca bigerê. OPCWyî dîyar kerdo ke dinya de %90ê çekanê kîmyewîyan ameyê çinkerdiş. Nê sazgeyî wexto ke yenê awankerdiş, seba ke xo bipawê mekanîzmayan zî awan kenê. Tena dewletî eşkenê muraceatê OPCWyî bikerê. Vurîyayîşî goreyê îhtîyacanê dewletanê rojawanî yenê kerdene.”

‘Çareserîye OPCW nîyo’
Dagdevîrene va, “Verî cû heyete doktoran ame astengkerdiş. La mintiqaya YNKyî de zî rewşe eynî ya. Çi heyf ke Kurdistanê Başûrî bîyo qerargehê Tirkîya. Hem hetê eskerî ra hem zî hetê ekonomî ra pabesteyê Tirkîya yo. Sazgeyê mîyannetewîyî çareserîya na meseleye nîyê. Senî ke tecrîdê Rayberê şarê Kurdî Birêz Abdullah Ocalanî de CPT çareserîye nîyo, meseleya kîmyewîyan de zî OPCW çareserî nîyo. Mesele sîyasî ya. Muxatabî dewlet û hukmat ê. Seba ke înan ser de tehda bêra ronayene, ganî paştîdayîşo mîyannetewî bêro xurtkerdiş. Wezîfeyê pîlî kewenê heqperestan, doktoran û doktoranê kurdan ser. Hetê Yewîtîya Doktoran a Dinyaye û Seba Heqanê Merdiman Doktorî ra malûmatî ameyê dayene. Nê zî tede, ganî torêka hîra bêra awankerdiş.”