Hedreyîyê ‘Rayîrşîyayîşê Merdimîye’ yenê kerdene

Hetê hemserekanê DBPyî yê Şirnexî ra gazîye ameye kerdene ke, bi ‘Rayîrşîyayîşê Merdimîye’ bêvengîye bêra şikitene.

Vera gurîyayîşê çekanê kîmyewîyan do 6ê Teşrîna Peyêne de Şirnex Silopî de rayîrşîyayîşêk bêro viraştene. Hedreyîyê rayîrşîyayîşî dewam kenê. Bajaranê derûdorî ra zî do şar do beşdarê rayîrşîyayîşî bibo.

Sûcê merdimîye!

Hemserekê DBPyî yê Şirnexî Zekî Îrmezî va, “No şer hem teberê exlaqî de yo hem zî teberê wîjdanî de yo. Kesê wayîrê exlaqî û wîjdanî ganî vera nê şerî de vinderê. Dîmenan ra aseno ke kîmyewîyî ameyê gurînayîş. Wezîrê Pawitişî va ma xazê îsotî gurînayo la eşkera yo ke kîmyewîyî ameyê gurînayîş. Ça de beno wa bibo, şerî de gurînayîşê kîmyewîyan sûcê merdimîye yo. Tirkîya hem hetê sîyasî ra hem zî hetê ekonomî ra rewşêka xirabe de ya. AKP-MHP wazenê xo pê şerî bixelisnê. Se kenê wa bikerê, hinî peynîya înan ameya.”

‘Bêvengîye paştî dana înan’

Îrmezî va, “Sazgeyê mîyannetewîyî eşkenê bi cîgêrayîşan sûcî tespît bikerê. Îqtîdar nê cigêrayîşan ra terseno. Prof. Şebnem Korur Fîncanci pisporê nê karî ya û serren ra nat kîmyewîyan ser o cigêrayîşan kena. Seba ke derheqê na mesele de malûmatî daye ameye girewtene. Îqtîdar malûmatanê aye ra tersa. Nêwazenê raştîye vejîya meydan. Wazenê her kes bêveng bo. Ganî şarê ma vera na bêvengîye vengê xo berz bikero. Bêvengîye ver şer giran beno. AKP-MHP na bêvengîye ra hêze genê. Ma ganî na bêvengîye bişiknê.”

Cinîyan rê gazîye

Hemsereka DBPyî ya Şirnexî Ayşe Salgucake zî va, “Ma do 6ê Teşrîna Peyêne de Silopî de bêrê têhet û heta berê Xabûrî bimeşê. Ma do vengê xo birasnê pêro dinya. Hinî bes o. Ma nêwazenê wa merdimî, ma nêwazenê wa domanê ma bimirê. Kesê ke wayîrê wîjdanî yê wa bibê beşdarê rayîrşîyayîşî. Ma cinîyî do tewr vernî de cayê xo bigerê. Ganî no şer biqedîyo. Wa hinî zerra dayîkan mevêşa. Coka ma nê rayîrşîyayîşî virazenê. Ganî her kes hinî mergan rê vajo ney.”

MA /ŞIRNEX