Rayîrşîyayîşê Merdimîye: Bê xoverdayîşî sewbîna çare çin o

Welatîyê ke vera kîmyewîyan bibî beşdarê Rayîrşîyayîşê Merdimîye dîyar kerd ke, xoverdayîşî ra teber sewbîna çere çin o.

Vera hêrîşanê kîmyewîyan ê Tirkîya, vîzêr Şirnex Sîlopya de Rayîrşîyayîşê Merdimîye virazîya. Xeylê kesî bîyê beşdarê rayîrşîyayîşî. Şar hetê esker û polîsan ra ame astengkerdiş la reyna zî hetê şarî ra gurînayîşê kîmyewîyan ame protestokerdiş.

‘Çalakîyê ma do dewam bikerê’

Hanîfe Umît a ke Mersîn ra bibî beşdarê rayîrşîyayîşî va, “Ma waşt raye ra şêrê la ma hetê eskeran ra ameyê astenkerdiş. Ma seba domananê xo, ziwan û kulturê xo tîya de yê. Heta peynîye ma do çalakîyanê xo biramnê. Ma tîya ra veng a pêro dayîkan danê; wayîrê domananê xo bivejîyê.”

Gazîya yewbîyayîşî

Cemîle Akbay a ke Qoser ra bibî beşdare va, “Ma seba domananê xo ameyê tîya. Bi çekanê kîmyewîyan domananê ma qetil kenê. Ma haştîye wazenê. Ma wazenê ma domanê ma û Birêz Ocalan hepis ra bivejîyê. Wexto ke ma bibê yew, do her çî bibo baş. Ma ganî wayîrê dewaya xo, ziwanê xo, nasnameyê xo û welatê xo bivejîyê.”

‘Ma do wayîrê domananê xo bivejîyê’

Nafîye Çoban a ke Edene ra bibî beşdare va, “Ma seba haştîye ameyê. Ma wazenê nê zulmî wedarê. Wa kîmyewîyan meerzê domananê ma ser. Hinî bes o. Wa erdê ma talan mekerê. Ma ganî bibê yew û domananê xo ser ra nê zulmî wedarê.”

Sureyya Yildiz a ke Qoser ra bibî beşdare va, “17 domanê m abi kîmyewîyan ameyê qetilkerdiş. Ma qey ê merdimi nêbî? Seba ke ma nê hêrîşan şermezar bikerê ma ameyê tîya. Wa na gonî vinda û wa hinî domananê ma qetil mekerê.”

MA / ŞIRNEX