Dêrsim de ajanîye yena ferzkerdene

Dêrsim de polîs wendekaranê Unîversîteya Munzurî rê ajanîye ferz keno.

Wendekaranê Unîversîteya Munzurî yê ke polîsan ajanîye ferzê ci kerda, derheqê babete de Komeleya Heqanê Merdiman (ÎHD) a Dêrsimî de eşkerayîye daye. Îdarekarê HDPyî û xeylêk wendekarî tewrê eşkerayîye bîyî.

Eşkerayîye ra verî Hemserekê ÎHDyî yê Dêrsimî Gurbuz Solmazî qisey kerd û pare kerd ke wextê peyênî de Dêrsim de ferzkerdişê ajanîye zêdîyayo. Solmazî vat: “Heyf ke dewlete ajanîye Dêrsim de vurnaye polîtîkayêke.”

Nameyê wendekaranê Unîversîteya Munzurî ser o Murat Aydinî metnê eşkerayîye wend. Aydinî ard ziwan ke alozî û polîtîkayê antîdemokratîkî vera wendekaranê unîversîte bîyî xorin. Aydinî vat: “Ma vera gef, teda, taciz û ajanîye xîret kenê. Wendekarê welatperwerî kampus û waran de yê. Ma vera ajanîye û tacîzî têgêrenê û nînan eşkera kenê.

Embazê ma yenê tacîzkerdene û seba ke ajanîye qebul nêkenê yenê tehdîtkerdene. Rejîmê qesre zaneno ke do şoro coka bi barbarî têgêreno û vano qey do çimê ma bitersno. Xîretê înan ser nêkewtî. Ma do vera polîtîkayanê çimtersnayîşî zî bi hêzê xo yo ke tarîxî ra girewto xover bidê.”

XWEBÛN