Polîsan Dêrsim de cinîyî asteng kerdê

Platformê Cinîyan ê Dêrsimî waşt bi wesîleya Roja Têkoşînê Vera Şîdetê Serê Cinîyan vilawekan vila bikero, la polîsan asteng kerd.

Platformê Cinîyan ê Dêrsimî qezaya Pulurî ra waşt bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan vilawekan vila bikero la polîsan bi bahaneya qedexeyê çalakîyan ê 5 rojan ê Walîtîye cinîyî asteng kerdî.

Cinîyan naye ser o eşkerayîyêke daye. Endama Platformê Cinîyan Nurşat Yeşîle pare kerd ke dewlete cinîyan nêpawena, eqsê ci cinîyan asteng kena. Yeşîle vat: “Rixmê astengî û hêrişan zî ma do meydanan de bibê.”

Raîfe Yilmaze dima eşkerayîya platformî wende û vat: “Wextê winasênî de ke şîdetê vera cinîyan tim zêdîyeno Peymana Stenbolî şewêke bi fermanê camêrdêkî wedarîyaye. Faîlê şîdetî seke yenê xelatdayene. Ma sey Platformê Cinîyan ê Dêrsimî tim hetê cinîyanê mexdûranê şîdetî de yê. Ma bi têkoşînî cewab danê zorbazîye. Ma 25ê Teşrîna Peyêne de do meydanan de bibê.”

XWEBÛN