Qeyûmî verê weçînayîşî qasê 9 mîlyonî zexîre herînayo

MA / Mujdat CAN / AMED

Qeyûmê Beledîyeya Bajarê Neweyî, verê weçînayîşî bi 2 îhaleyan qasê 9 mîlyon TLyî zexîre herîna.

Qeyûmê Beledîyeya Bajarê Neweyî ya Amedî, verê weçînayîşê 31ê Adare bi mîlyon lîrayan zehîre herîna. Hetê Mudirîyetê Sosyal û Kulturî ra 16ê Teşrîna Verêne de îhaleyêk ame viraştene û seba 11 qelemanê zexîreyî bi 7 mîlyon û 679 hezaran îhale ame dayene.

28 hezar paketî meqerne!

Bi nê îhaleyî 7 hezar bîdonê rûnî, 14 hezar şekero toz, 14 hezar paketî riz, 14 hezar paketî berxûl, 14 hezar paketî fasleyî, 14 hezar paketî ardî, 14 hezar paketî salça, 7 hezar paketî zeytûn, 28 hezar paketî meqerne, 14 hezar paketî mercû, 35 hezar paketî sole ameyê herînayîş.

26ê Êlule de zî îhaleyêk ameyo viraştene û qasê 1 mîlyon û 301 hezar TLyî zexîre ameyo herînayîş. Her di îhaleyî zî dîyayê şîrketanê Y.A. û R.D.yî.