Girê Filehan de 2 hezar û 687 berhemê tarîxîyî ameyê dîyayene

Dewêka Karazî ya Dîyarbekirî de, kinitişanê Girê Filehan de 2 hezar 687 berhemê tarîxîyî ameyê dîyayene. Tarîxê înan raseno verê mîladî.

Xebatê kinitişî bi rayeberîya Prof. Ayşe Tuba Okseye yenê ramitene. Koma kinitişî de arkeologî, restorator, antropolog û tarîxnasê hunerî estê. Berhemê ke Girê Filehan ra vejîyayê, hetê na kome ra ameyê pakkerdiş û teslîmê Muzeya Dîyarbekirî bîyê. 

Prof. Ayşe Okseye derheqê kinitiş û berheman de va, “Tarîxê nê berheman zaf kehen o. 11-13 hezar serrî yê. Ma 3 çalî anayê û xorînîya înan rasena 10 metreyan. Na çalan ra yew hemdema Girê Miraza ya. Tîya de rîtûelî ameyê kerdene. Tîya de cuya komelkî zî bîya, ma raştaraşt nêşkenê vajê ke perestgeh ê. Çimkî hema hende malûmatî destê ma de çin ê. Nê awanîyî zî sey Girê Miraza taybet ê.”

2 hezar û 687 berhemê tarîxîyî Girê Filehan de ameyê dîyayene. Înan ra 1023 hebî seba nîşandayîşan ameyê abirnayîş û ê bînî zî seba xebatanê akademîkan abirîyayê. 

Arkeologe Ozlem Ekînbaşe va, “Senî ke seba xeta Feratî Girê Miraza bîyo sembol, Girê Filehan zî eşkeno xeta Dîcleyî rê bibo sembol.”

BÎANET / AMED