Girewteyan dest bi greva veşanîye kerde

Girewteyan seba ke paştî bidê kampanyaya ‘Abdullah Ocalanî rê azadî, meseleya Kurdan rê çareserî’ dest bi greva veşanîye kerde. Girewte Yakûp Akmanî dîyar kerd ke heta gamêk meerzîya do çalakî dewam bikera.

Girewteyanê hepisxaneyanê Kurdistan û Tirkîya vizêrî dîyar kerdibi ke ê do paştî bidê kampamyaya ‘Abdullah Ocalanî rê azadî, meseleya Kurdan rê çareserî’ û bikewê greva veşanîye.

Çalakîye ewro dest pêkerde. Greva veşanîya bi dore do heta 15ê Sibate 2024î dewam bikera.

‘Heta ke gamî bêrê eştene do çalakîya ma dewam bikera’

Yakûp Akman o ke Hepisxaneyê Sîlîvrîyî de yo seba ke paştî bido kampanyaya ‘Abdullah Ocalanî rê azadî, meseleya Kurdan rê çareserî’ ewro dest bi greva veşanîye kerde.

Akmanî keyeyê xo reyde telofon de qisey kerdo û derheqê çalakîye nê çîyî vatê:

“Ez bi nameyê girewteyanê sîyasîyan şarê xo yê erjaye û welatperwerî selam kena. Birêz Ocalanî ser de tecrîdêko zaf giran yeno ramitene û ci ra xebere nîna girewtene. Na rewşe ver şarê ma û ma kewenê qisawetan ver. Ma do tecrîdî qebûl mekerê. Ma girewteyê sîyasîyî seba ke tecrîd bêro wedartene, Birêz Abdullah Ocalan biraso azadîya xo ya fizîkî û meseleya Kurdan bi rayanê demokratîkan çareser biba kewtê greva veşanîye û ma şarê xo pê hesnenê. Heta ke gamî bêrê eştene do çalakîya ma dewam bikera. Ma şarê xo zî silaynenê nê xoverdayîşî. Biciwîyo xoverdayîşê zindanan.”

YENÎ YAŞAM