Wazenê Abdulmenaf Osmanî 6na aşmî GGM de tepişê

Awiqata ci Bêrîvan Bekçî dîyar kerd ke vera nê qerarî do dewa bêra akerdene.

Nuştoxo Kurd Abdulmenaf Osman, 30 serran ra dima hepis ra vejîya. Derheqê ci de hetê Daîreya Koçî ya Manîsa ra qerarê sînor ra teberkerdişî ame dayene. Hetê Îdareyê Koçî yê Edîrneyî ra zî qerar ame dîyayene ke do Osman 6na aşmî tepişte bimano.

Seba ke qerar bêro wedartene awiqatî hazirîye kenê ke dewa akerê. Hetê merdimanê Osmanî ra no qerar ame rexnekerdiş.

Ganî bêro veradayîş

Warzayê Osmanî Salîm Kaplanî va, “Waya ci ya heqe, warzayê ci tîya de yê. Xalê mi 2021î de rewşa şerî ver konsolosîye ser ra Hollanda rê muarcatê îltîcayî kerdibi. Hema zî qerarêk nêameyo dayene. Hukmê xo qedînayo û tehlîye bîyo. Seba ke vejîyo teber ganî pasaportê xo vejo û prosesî teqîb bikero. Seba nînan zî ganî cade bêro veradayîş.”

Dewa do bêra akerdene

Awiqata Osmanî Bêrîvan Bekçî va, “Derheqê ey de qerarê 6 aşmî  teqîbkerdişê îdarîyî û sînor ra teberkerdişî ame dayene. Ma do vera qerarê teqîbkerdişê îdarîyî îtîraz bikerê û vera sînor ra teberkerdişî zî dewaya îdarî akerê. Ma do bi nê dewayan qerarî bidê vindarnayane.”

Bekçî dîyar kerd ke Abdulmenaf Osman Merkezê Têpîyaerşawitişî yê Edîrneyî de yo û rewşa ey baş a. 

YENÎ YAŞAM