Cinîyanê girewteyan vera binpaykerdişan muracatê CPTyî kerd

Cinîyanê girewteyan ê Hepisxaneyê Sîncanî derheqê binpaykerdişê heqan de CPTyî rê muracat kerd.

Cinîyanê girewteyan ê Hepisxaneyê Sîncanî, seba ke derheqê binpaykerdişê heqan de cigêrayîşî bibê, muracatê CPTyî kerd. Muracatî de bale ancîyaye merganê hepisxaneyan ser o. Derheqê mergê Şakîr Tûranî de ame vatiş ke, “Ci rê teşhîsê kanserî amebi dayene la reyna zî nêame veradayîş. Seba ke neweşîya xo îspat bikero ganî bimerdêne. Çunke ATK rapor dabi ke eşkeno hepisxane de bimano. Derheqê Şakîr Tûranî de qerarê ATKyî ramojneno ke girewteyê sîyasîyî bi qeraranê sîyasîyan hepis de yenê girewtene.”

Ame dîyarkerdiş ke serrêke de 81 kesan bin o qeyde cuya xo vîndî kerde û ame vatiş ke, “Nê mergan ser o cigêrayîşî nêameyê kerdene û şikdar mendê. Her merg o ke binê kontrole hukmatî de qewimîyayo, cînayet o. Zafê nînan girewteyê nêweşî bî. Nê girewteyî fikranê xo û faalîyetanê xo yê sîyasîyan ver û seba ke Kurd ê bîyê hedef. Vera şarê Kurdî hepisxaneyan de kerdenî rayayê astanê faşîzanan. Waştişê demokratîkî yê qijkekî zî benê sebebe ciperdayîş û cezayan.”

CPT paweyê mergê înan o?

Ame dîyarkerdiş ke bi qanûnê înfazî yê peyênî endamê Ergenekon û Hîzbullahî û bê nînan mafyayî, tecavizkarî û dizdî ameyê veradayîş û Kurdî terke mergî bîyê û ame vatiş ke, “Şertê girewteyanê Kurdan çend şina yenê girankerdiş. Înfazê 313 girewteyanê sîyasîyan ame taloqkerdiş. CPT vindeno ke wa girewteyê nêweşî bimirê? Heqîqet no yo ke, xeylê girewteyê Kurdî cezaya înan qedîyaya, cezayê înan ê dîsîplînî çin ê û seba ke ê faalîyetanê xo ver poşman nîyê nînê veradayîş.”

‘Çîyêk bikerê’

Ame dîyarkerdiş ke hema zî îşkenceyî dewam kenê û ame vatiş ke, “Hepisxaneyanê Tirkan de xeylê girewteyî raştê kerdenanê faşizan û nîjadperestan yenê. Merg û cînayetê sîstematîkî netîceya nê kerdenan de dewam kenê. Bi qanûnê neweyî, heqê hêvîye yê girewteyan ame wedartene. Girewteyê nêweşî terke mergî benê û heqê pêvînayîşan yenê sînorkerdiş. Ganî CPT derheqê binpaykerdişanê hepisxaneyanê Tirkan de cipersayîş û cigêrayîşêk bido dest pêkerdene. Rapor ganî raya pêroyîye de bêro parekerdene, Tirkîya ganî bêra hişyarkerdiş û bêra mehkûmkerdiş. Bi lezabeze çîyêk bikerê.”

MA / ENQERA