Kayê Îlhan Samî Çomakî do Sehneyê Modayî de bêro kaykerdene

• Derhêner Kemal Aydogan: Îlhan Samî Çomak bineheqî 28 serran ra hepis de yo. Na rewşe bîye bingeyê nê kayî.

BARIŞ KOP / PÎRHA / ÎSTANBÛL

Şaîr Îlhan Samî Çomak 28 serran ra nat bineheqî hepis de yo. Kayo ke bi nameyê ‘Cuye Ez To ra Zaf Hes Kena’ ke hetê Şaîrî na nusîyayo do 8ê Êlule de Sehmeyê Modayî yê Kadikoyî de bêro kaykerdene. Derhênarîya kayî hetê Kemal Aydoganî ra yena kerdene û kaykerdoxî zî Gulseren Medare û Elî Tekbaş ê. Dêrhêner û kaykerdoxanê kayî derheqê kayî de qisey kerdo û înan malûmatî dayê.

Dernêherê kayî Kemal Aydoganî va, “Îlhan Samî Çomak bineheqî 28 serran ra nat hepis de yo û na rewşe seba mi bîyê bingeyê nê kayî. Na rewşe binpaykerdişê heqanê merdiman a. Ez xo berpirsîyar hîs kena ke, na rewşe biyarî rojaneyî. Ez 7-8 serran ra nat ey teqîb kena. Tewr peynî bîyografîyê ci ame weşanayîş. Dima fikrê kayviraştişî ma de bi zelal. Bîyografîyê ci raşta zî zaf dewlemend bi. Mi kitabî ra çend beşî vîjnayê û mi werîsê Îlhanî ra va beno ke Îlhan biwazo înan ra kayêk binuso. Îlhan Samî zî qebul kerd û mîyanê aşmêk de kayêk nuşt. Dim ama Gulseren û Elî reyde ameyê têhet. Înan kay ra zaf hes kerd û a roje ra nat ma kayî ser o xebitîyenê.”

Gulseren Medare va, “Wexto ke mi kay wend, mi vatêne gelo ma do halê hepsîyêk senî kay bikerê. La wexto ke mi kay wend, mi hêza berhemî dî û ez kewta heyecan. Mi verî cû kaykerdoxîya Muzîkalî kerde û ez muzîsyen a. Ez na xebate de zaf çîyan musaya. Ma kayî de heqibeyê domantîya Îlhan Samî Çomakî veng kenê.”

Alî Tekbaşî va, “Ez tekstî ver xeylê hîsdar bîya. Provayê ma do heta 8ê Êlule dewam bikerê. ma zaf biheyecan ê. Ma wazenê domantîya Îlhan Samî Çomakî, hîsanê ci bimojnê temeşekerdoxan. Coka ma biheyecan paweyê roja kaykerdişê kayî yê.”

Kay do 8-9-10-11ê Êlule de Sehneyê Modayî yê Kadikoyî de bêro kaykerdene. Şaîr Îlhan Samî Çomak nika Hepisxaneyê Sîlîvrîyî de yo û hema tehlîyeyê ci rê 2 serrî estê.