Komeleya Ekolojîyî ya Dîyarbekirî ra seba domanan projeyêk

Nûçeyên Komel û Cuye

sêşem 11 Çiriyê 2022 - 16:00

ROJDA AYDIN / JINNEWS / AMED

Endamanê Komîsyonê Domanan ê Komeleya Ekolojîyî dîyar kerd ke, domanî bajaran de xoza ra dûrî manenê û ê wazenê bi xebatanê xo domanan xoza ra nêzdî bikerê.

Kurdistan de daristanî yenê talankerdiş, bi HES û awbendan xoza yena çinkerdiş û domanî zî herre ra û xoza ra yenê dûrîvistiş. Vera na rewşa hetê Komîsyonê Domanan ê Komeleya Ekolojîyî ya Dîyarbekirî ra xebatî yenê ramitene.

Endamanê Komîsyonê Domanan ra Leyla Çîte û Nurşen Arslanere derheqê xebatanê komeleye de qisey kerd.

‘Ma waşt wa domanî xoza bişinasnê’

Leyla Çîte va, “Bi bajarbîyayîşî merdimi û bitaybetî zî domanî xoza ra dûrî kewtê. Na rewşe ver do ameyox de probleme pîlî peyda bibê. Seba ke ma verê nînan bigerê, komîsyonê ma bi perspektîfê ekolojîyo komelkî ame awankerdiş. Ma wazenê têkilîya xoza û merdiman newe ra xurt bikerê. Sere de ma wazenê domanan de nê têkilîyî bêrê xurtkerdiş. Ma wazenê bi xebatanê ma domanan de hişmendîyêka ekolojîke awane biba. Domananê bajarî de eko-fobîyêk peyda bîyo. Domanî heywanan ra, gandaran ra xoza ra tersenê. Aye ra ma waşt wa domanî xoza bişinasnê.

‘Tayê domanan hema Hewsel nêdîyo’

Çîte va, “Ma wendegehan de domanan zîyaret kenê. Nê domanî yenê şonê la ganî na têkilîya ma hîna bêra xurtkerdiş. Ma hêverî bernameyê 4 hefteyan viraşt. Domananê 8-10 serrîyan reyde ma bernameyêk viraşt û m ani no qeyde dest pêkerd. Domanî heywanan de ameyê têhet û kewtê mîyanê waş û nebatan. Ma heyecanê înan dî. D3iyarbekir de xeylê domanan hema Hewsel nêdîyo. Ma do domanan reyde daran ronê û bezreyan bişinasnê. Ma do vaş û nebatan bimusnê înan. Ma do xebatanê xo bi Kurdkî biramnê. Ma do gêrayîşanê xoza organîze bikerê, fîlman bide ramojnayîş û bernameyanê estanikan bivirazê.”

‘Domanî gandeyan nêşinasnenê’

Endama komîsyanî Nurşîn Arslanere va, “Domanî verî cû kuçeyan de bî. Xoza hetê înan ra ameyene keşfkerdiş. Nika domanî kuçeyan ra dûrî yê û merkezanê dayîş û girewtişî de benê pîl. Domanî nika gandeyan nêşinasnenê. Ma leteyê xoza yê û ma wazenê domanî xoza bişinasnê. Domanî wexto ke xoza mîyan de çîyêk kenê, pê zaf benê keyfweş. Ma wazenê xebatanê xo aver de berê û xo birasnê hîna zêde domanan. Sûr de şerêko pîl qewimîya. Cayê kayê domanan zî rijîyayê. Ne darî mendê ne zergûnî. Wexto ke ma domanî berdê mîyanê zergûnî, ma pê hesîyayê ke ê çiqas hesretê nê çîyan mendê. Ma wazenê bi xebatanê xo paştî bide domanan.”

parvê bike

   

Yeni Özgür Politika

© Copyright 2023 Yeni Özgür Politika | Mafên belavkirinê parastî ne.