‘Ma do rêxistinîya cinîyan xurt bikerê’

Endama Meclîsê Cinîyan ê HDPyî Songul Şarkli konferansê cinîyan de dîyar kerd ke do rêxistinîya cinîyan bêra xurtkerdene.

Endama Meclîsê Cinîyan ê HDPyî Songul Şarkli Konferansê Cinîyan ê Partîya Çep a Keske de wina vat: “Ma do rêxistinîya cinîyan a xurte awan bikerê û mîyanê partîye de serdestîya camêrdan zî qels bikerê.”

Şarkli ard ziwan ke weçînayîşan ra dima înan şarî reyde kombîyayîşî kerdî, rexneyî girewtî û pêşnîyazî arê dayî. Şarkli vat: “Bi nê hawayî ma konferansê xo kerd. Konferans de xeylêk nîqaşê cidî û tesbîtê raştî ameyî kerdene. Ma hêvî kenê ke çareserkerdişê meseleyan de ma do îradeyêkê hîna cidîyî bimojnê.

Îtîfaqê Kede û Azadîye xeylêk rexneyî girewtbî, bi taybetî babeta namzetan de. Reyna paştdayîşê namzedîya Kiliçdarogluyî zî xeylê ame rexnekerdene. Nê rexneyî seba mi zî raşt ê, ez zî wina fikirîyena. Reyna meseleyê ma yê awanîyî ameyî rexnekerdene. Xûlasa pratîk de ma xo cewabê nê rexneyan bidê.”

Songul Şarkli îfade kerd ke hem rêxistinîya cinîyan de hem zî karê pêroyî yê partîye de qelsîye est a û vat: “Ma do na mesele zî çareser bikerê. Seba xurtkerdişî ganî ma karêkê aktîfî bikerê. Ma do rêxistinîya cinîyan a xurte awan bikerê û mîyanê partîye de serdestîya camêrdan zî qels bikerê. Warê ma teng benê û tay çîyî cinîyan partîya ma ra dûrî kenê. Tedbîrê ney afernayîşê rêxistinîya cinîyan a xurt a.”

XWEBÛN