‘Merdimo ke Kerrayan de Qisey Keno’

SEDAT BARIŞ / PÎRHA

Mehmet Kuşman qelaya Uratûyan de 60 serran ra nat dergewanîye keno û bi xo Urartûkî musayo.

Mehmet Kuşman 82 serrî yo. O Wanî de qelayêka Urartûyan de 60 serran ra nat dergewanîye keno. Kuşman xo bi xo Urartûkî musayo. Dinya de tena 12 kesî nê ziwanî zanê. Mehmet Kuşman eşkeno bi Urartûkî binuso zî. Nika cuya ey ser o belgefîlmêk ameya hedrekerdene. Derhênerîya begefîlme hetê Bulent Boralî ra ameya kerdene. Boralî verî cû belgefîlma Silo Qizî viraştibî. Belgefîlme verî cû Brezîlya de ameyê ramojnayene. Dima Amerîka de festîvalêk de xelatêk girewte. Belgefîlma ‘Merdimo ke Kerrayan de Qisey Keno’ do 30ê Hezîrane de Documentarîstî de bêra ramojnayene.

Derhênerê belgefîlme Bulent Boralî derheqê hedrekerdişê belgefîlme de va,  “Mi xeberan de dî, vatêne Apo Memet Wan de qelayêk de dergewan o û Urartûkî musayo. Xora kêmî kesî nê ziwanî zanê. Apo Memet dewa xo ra nêvejîyayo û perwerdeyo verên zî teber ra girewto. No mi rê zaf ecêb ame. Mi qerar da ke cuya ey ser o belgefîlmêk biancî. Wexto ke ma belgefîme ante, mi ferq kerd ke Apo Memet cayê xo de netebitîyeno û timûtim wazeno bimuso.”