Muslîm: Fransa ganî vera qetlîamî bi cidîyetî têbigêro

• Hemserekê PYDyî Salih Muslîmî dîyar kerd ke ganî Fransa qetlîamî cidî bigero û va, “Eke qetlîamê vera 3 cinîyanê xoverdayoxan zelal bibîyêne, ewro no qetlîam nêbîyêne.”

Hemserekê PYDyî Salih Muslîmî, derheqê hêrîşa Parîsî de û tecrîdê îraliyî de ANHA rê qisey kerd.

Muslîmî dîyar kerd ke, binkewtişê DAÎŞî ra dima vera Kurdan konseptê çinkerdişî kewt kar û va, “Nika seba ke Kurdan qirbikerê, mîyanê seferberîye de yê. Înan dî ke planî nêşinê sere, çekê kîmyewîyî gurînayê.”

Derheqê tecrîdê Îmraliyî de Muslîmî va, “Nameyê CPTyî de vergirewtişê îşkenceyî ca geno, teöaşekerdişê îşkenceyî ney. La heta ke mevajo Îmrali de îşkence esto, do sey sazîyê temaşekerdişî bimano. Heta dewlete destûr medo nêşkeno raporanê xo zî eşkera bikero. Îmrali de îşkenceyo fizîkî û psikolojik esto. Ganî no bêro vînayene.”

‘Ganî qetlîam bêro zelalkerdiş’

Muslîmî va, “Kurdistanê Bakurî û Tirkîya de operasyonê qirkerdişî yê sîyasîyî yenê ramitene û teber de zî qetlîamî yenê kerdene. No qetilkar 12 rojî verî cû zere ra vejîyayo. Zere de kam ey de kewto têkilîye û seba ke Kurdan bikişo sîleh dayo ci. Dewleta Fransa nêşkena xo nê sûcî ra bilelisna. Çunke eke qetlîamo ke 2013î de vera 3 cinîyanê xoverdayoxan ame kerdene biamêne zelalkerdiş, ewro no qetlîam nêbîyêne. Faalîyetê îstîxbaratê Tirkan yenê nimitene. Xeylê planê înan deşifre bîyê.”

Dewamê qiseykerdişê xo de Muslîmî va, “Dewleta Tirke vana ez nêverdena şima şehîdanê xo yad bikerê. Wazenê bi nê hêrîşan Kurdan bitersnê. Vejîya meydan ke qetlîamê 3 cinîyan hetê Mîtî ra ameyo kerdene. La Fransa astengîye arde dosya ser. Çira? Seba ke îstîxbaratê Fransa ra tayê kesî tede bîyê serê dosya ame girewtene. A roje no sûc nêameyêne nimitene, pêro sûcdarî do deşifre bibîyêne.”

Muslîmî peynî de Fransa rê gazîye kerde ke qetlîamî cidî bigero û va, “Seba ke dirûstîya xo ispat bikero ganî Fransa qetlîamî zelal bikero. Ganî sey verî nîme de meverdo. Eke nîya bikero do sûcanê newîyan rê ber akero.”

MERKEZÊ XEBERAN