Qeyyûmî hetkarîyî vila nêkerdê, kiriştê depoyê AFADî

RÛKÎYE ADIGUZEL – ABDURRAHMAN GOK / MA / MEREŞ

Bazarcix de 15ê Sibate de qeyyûmî dest nabi merkezê hetkarî yê dewa Hesenkocayî. 12 rojî dima hetkarîyî tîya ra ameyê kiriştiş.

Erdlerze ra dima, dildarî bi rayberîya HDPyî şîyê Bazarcix, heta 15ê Sibate hetê dildaran ra hetkarîyî rasayê mexdûranê erdlerze. Kurdistan û Tirkîya ra xeylê rêxistinî, komeleyî ameyê tîya, Ewrûpa ra zî hetkarîyî ameyê û keyeyê dewe de nê hetkarîyî tasnif bîyê û ameyê vilakerdiş. 

Qeyyûm 12 rojî dima şi

7ê Sibate ra heta 15ê Sibate hetê dildaran ra 30 ra zêder TIRî û xeylê komyonetî hetkarî mehlayan ra ame vilakerdiş. Qeyyûm ke ame, vatibî ‘ez do dildaran biyarî û hetkarîran vila bikerî’. La 12 rojî hetê qeyyûmî ra hetkarî nêameyê vilakerdiş. Welatîyan dîyar kerd ke, tena tayê çîyî nasanê xo mîyan de vila kerdê. Vîzêr qeyyûm û qefleyê xo hetkarîyî bar kerdê kamyonan û keyeyê dewe ra vejîyayê.

Hetkarîyî kirişîyayê depoyê AFADî

Bê konêk, pêro konî ameyê wedartiş, sobayî, batanîyeyî, werdê domanan, kincî û zexîreyî bi kamyonan kirişîyayê depoyê AFADî.

‘Ameyê talankerdiş’

Welatîyan va, “Înan her çî talan kerd. Tîya de paştîdayîşêko baş estibi. Ciwanan kedêka pîle daye. Şew û roj seba ma xebitîyayê. Hetkarîyî hetê înan ra rasayê hewcedaran. Nê xebatî sey şovî kamerayan rê nêameyê kerdene. La hetê AFAD û qeymeqamî qeyyûm erzîya tîyayî ser û înan dest na her çî ser. Înan vatêne ma do vila bikerê. La înan hetkarîyî nêberdê dewêk zî. Her çiqas înan tîya ra her çî kirişna zî, qet nêbo ê tîya ra şîyê.”