Sazîyanê ziwanî ra malûmato şerîk: Ganî Kurdkî bibo ziwanê perwerdeyî

Sazîyanê ziwanê Kurdkî va, “Kurdî ganî bi bingeyê heqîqet û erjanê xo bi Kurdkî perwerde bigerê. No statu ganî Qanûno bingeyî û waro mîyannetewî de bigêrîyo binê garantîyî.”

Hetê 16 sazîyanê ziwanî ra vera ‘Dersa Weçînitîye’ biyayîşê Kurdkî malûmato şerîk ame dayene. Malûmatî de ame dîyarkerdiş ke, vera ziwanê Kurdkî tedayî, qedexeyî, polîtîkayê asîmîlasyınî û çinhesibnayîşî dewam kenê. Ame vatiş ke, “Kurdî, ziwanê Kurdkî û Kurdistan  bêstatu yenê verdayene. Ma hol zanê ke, mileto bêstatu mîyanê wextî de beno vîndî. Na rewşe hetê Tirkîya ra Kurdan ser de bi tewir-tewir rayîran yena ramitene.”

‘Ganî Qanûno Bingeyî de bigerîyo binê garantîyî’

Malûmatî de ame dîyarkerdiş ke, dewlete sey gamanê ‘dersa weçînitî’ şarî xapînena û nêwazena Kurdkî bibo ziwanê perwerdeyî. Ame vatiş ke, “Dewlete wazena polîkîyanê xo yê asîmîlasyonî binimna, hişê Kurdan lêl bikera û na babete de Kurdan mîyan de pênêameyîşan peyda bikera. Hetêk ra zî vera erjanê Kurdan her hetî ra hêrîşanê giranan kena. Dewleta Tirke ganî polîtîkayanê xapî ra fek raverda. Ganî vera Tirkî senî têgêrena, vera Kurdkî zî wina têbigêra. Bi nê bingeyî, ganî mektebo verên ra heta zaningeh Kurdkî her aste de bibo ziwanê perwerdeyî. Kurdî ganî bi bingeyê heqîqet û erjanê xo perwerdeyo Kurdkî bigerê û no statu ganî Qanûno Bingeyî û waro mîyannetewî de bigêrîyo binê garantîyî.”

Sazîyayanê ke malûmatî de ca girewto nê yê: “Kovara Destarî, MED-DER, ARÎ-DER, ARSÎSA, BOTAN-DER, AVESTA, FERAD-DER, Komaleya Birca Beleke, ANKA-DER, Komeleya Edabîtkaranê Kurdan, Enstîtuya Kurdî ya Îstanbûlî, Enstîtuya Kurdî ya Amedî, Enstîtuya Kurdî ya Stockholmî, Enstîtuya Kurdî ya Brukselî, Enstîtuya Kurdî ya Elmanyayî, Enstîtuya Kurdî ya Swîsreyî.”

MA / DÎYARBEKIR