Xozaya Dêrsimî bi birnayîşe daran yena qirkerdiş
pêncşem 28 tîrmehê 2022 - 16:34
Dewanê Xozatî yê Şamoşî û Zogarî de 2 aşman ra nat darî yenî birnayene.
Vera kultur, xoza û bawerîya Dêrsimî hêrîşî roje bir oje zêdîyenê. Daristanî par operasyonan de ameybî vêşnayîş û emser zî bi mehneyê newe ra zergûnkerdişî yenê birnayene. Dewanê Xozatî yê Şamoşî û Zogarî de daristanî yenê qirkerdiş. Nê mintiqayî 1994î de hetê dewlete ra ameybî vengkerdiş.
Wekîlê HDPyî yê Dêrsimî Alîcan Onlû û Serekê HDPyî yê Dêrsimî Ferhat Yildizî şîyê cayê birnayîşê daran û hetê înan ra cigêrayîşî ameyê kerdene.
‘Dêrsim de qetlîamê daran yeno kerdene’
Wekîlê HDPyî yê Dêrsimî Alîcan Onlûyî va, “Par daristanî ameyê vêşnayîş û emser zî bi mehneyê newe ra zergûnkerdişî yenê qirkerdiş. Darê ternî yenê birnayene. Keso ke bivêşno nêşkeno zergûn bikero. Vera kultur, ziwan û bawerîya Dêrsimî dişmenitî kenê. Cayê ke par nêvêşayê, emser bi birnayîşî yenê qirkerdiş. Ganî heskerdoxê xozaye yê Kurdistan û Tirkîya vera nê qetlîamî vengê xo berz bikerê.”
PÎRHA / DÊRSIM