Ziwanê dayîke rê eleqe zêdîya

Nûçeyên Komel û Cuye

în 9 îlonê 2022 - 10:52

MED-DER de 2020 de 292 kesî tewrê kursanê kurdkî yê online bîbî û na hûmare 2022 de bîye 803. Vera kursanê kurdkî eleqe zêdîya.

Komeleya Cigêrayîşê Ziwan û Kulturî yê Mezopotamya (MED-DER) vizêr raporê Merkezê Cigêrayîşanê Warê Sosyopolîtîkan ê derheqê eleqeyê vera kursanê ziwanê dayîke yê kurdkî bi kombîyayîşê çapemenîye eşkera kerd. Kombîyayîşo ke banê komele de ame kerdene de îdarekarê Merkezê Cigêrayîşanê Warê Sosyopolîtîkan û MED-DERî tewrê ci bîyî.
Kombîyayîş de ame vîrvistene ke rixmo ke Tirkîya mîyanê welatanê zaf ziwanan de ya bê tirkî ziwanê bînî nînê musnayene û waştişê perwerdeyê ziwanê dayîke tim rojdem de yo û wina ame vatene: “Bi serranê dergan dezgehanê komelê sîvîlî bi kursanê ziwanê dayîke cehd kerd ke kurdkî bipawê û bidê musnayene.
Serranê 2012-2013an de ziwanê dayîke mekteban de sey dersa vîjnayîye ame dayene la hema waştişê perwerdeyê ziwanê dayîke nêameyo caardene. Çend şino vera kurdkî eleqe zêdîyeno û kursî zafêr benê. Bitaybetî wextê pandemî de eleqeyê vera kurdkî zêdîya. ”
Raporê kurmancî hetê Dîlan Guvençe û kirdkî hetê Nesîp Gultekînî ra ame wendene. Rapor de bale ameye serantene ke vera kursanê kurdkî eleqe zêdîya û nê ameyî vatene: “Wextê pandemî de 2020 de 292 kesî tewrê kursanê kurdkî yê online yê MED-DERî bîyî. Na hûmarê 2021 de bîye 397 û 2022 de 803. Kursê ke verî online û yew dewr bîyî nika di dewr û hem online hem zî rî bi rî yenê kerdene. Serra verêne 34 bajaranê Vakurê Kurdistanî û Tirkîya ra û Amerîka, Ewropa, Başûr û Rojhilatê Kurdistanî ra tewrbîyayîş bîyî. Serra diyêne 41 bajar û emser 43 bajaran ra tewrbîyayoxî estê. Zafê tewrbîyayoxan cinî, wendekar û ciwan ê. Seranê verênan de zafê tewrbîyayoxan kurmanc bî, emser hûmara kesanê ke gorankî, dimilkî û sorankî qisey kenê zêdîyaye. ”

XWEBÛN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.