Greenpeace: Birnayîşê daranê mintiqa teberê pisporîya ma de yo

• Greenpeaace derheqê talanbîyayîşê xozaya Kurdistanî de va, “No teberê pisporîya ma de yo.”

OMER AKIN / MA / ŞIRNEX

Greenpeaace derheqê talanbîyayîşê xozaya Kurdistanî de va, “No teberê pisporîya ma de yo.”

Baroya Şirnexî derheqê talanbîyayîşê xozaye û birnayîşê daran de Greenpaeceyî rê gazîyêk kerdibî. Greenpeaceyî vato “Babete teberê pisporîya ma de ya”. Awiqat Sabrî Çatikkaşî va, “Xozaya Akdeniz(Deryayo Sipî)î xoza ya, xozaya Kursistanî xoza nîya?”

Ocaxanê madenî, awbendan, HESan û ocaxanê qûmî ver xozaya Şirnexî yena talankerdiş. Hetê qorîcîyan ra daristanê Cûdî, Besta û Gabarî qir benê. Demêk verî cû Komîsyonê Bajar û Derûdorî yê Baroya Şirnexî seba ke vengê xo bikerê Greenpeace, Weqfa Pawitişî ya Cuya Xozayî(WWF) û Weffa Pawitişî ya Erjanê Kulturî û Derûdorî rê gazîyêk kerdibî.

‘Teberê pisporîya ma de yo’

Greenpeaceyî hefteyêk verî cû cewab dabi Baroya Şirnexî. Greaenpeaceyî vato, “Ewro her cayê Tirkîya de vera xoza sûcî yenê kerdene. Ma îmkanan ver nêşkenê birasê her ca. Greenpeace şexsan ra paştî geno û tayê meseleyan ser o xebitîyeno. Şima maîlê xo de seba birnayîşê daran nêrehetîya xo arda ziwan. Ma vera heme qirkerdişan de yê la na babete teterê pisporîya ma de ya. Ma eşkenê şima dezgeyanê bînan de bifînê têkilîye.”

Mudirtîya Daristanî daristanan qir kena

Endamanê Komîsyonê Bajar û Derûdorî yê Baroya Şirnexî ra awiqat Sabrî Çatikkaşî va, “Daristanî hetê Mudirtîya Daristanî ra qir benê. No talan bi îhaleyan yeno kerdene. Îhaleyî dîyêne merdimanê înan. Bi destê nê şexsan daristanê Şirnexî qir benê. Ma derheqê talanbîyayîşê xozaye de dezgeyanê derûdorî rê gazîyî kerdê. Heta nika tena Greenpeace cewab da. Înan cewabê xo de m ama nêşkenê çîyêk bikerê û no teberê pisporîya ma de yo. 

Dirîtîye

Derheqê cewabê Greenpeaceyî de Sabrî Çatikkaşî va, “Ma xerîbê nê cewabî nîyê. Wexto ke mesela bena xozaya Kurdistanî vateyê înan beno yew. Heta nika zere û teber ra qet yew dezgeyêk seba talanbîyayîşê daristanan çîyêk nêvato. Ma zanê çira vengê xo nêkenê. Nêwazenê vera dewlete çîyêk vajê. Na dirîtîye ya. Mîyanê xozayan de cîyagirewtiş nêbeno. Xozaya Akdenizî xoya ya, xozaya Kurdistanî xoza nîya qey? Uca de ganderî qir bene tîya de nêbenê? Eke xozaya Kurdistanî talan bibo, no do bandorê xozaya Akdenizî mekero? Na raşta zî dirîtîye ya. Ver ana dirîtîye ganî pêro sazge û dezgeyê Kurdistanî bêrê têhet. Seba ke ma talanbîyayîşê xozaya Kurdistanî bivindarnê, ganî ma pêro pîya bixebitîyê. Ganî vateyê ma yew bo. Eke vateyê ma yew bo, ma eşkenê nê talanî bivindarnê.”