‘Dejî pê parekerdişî kêmîyenê’

• Asli Fîlîz, Çewlîg ra koç kerde şîye Almanya. Fîlîz Karê grafîk û dîzaynî kena. Nika zî pêşengeha xo ya verêne Hambûrgî de akena. Fîlîz vana, ‘Dejî pê parekerdişî kêmî benê’.

Pêşengeha verêne ya A. Asli Fîlîze bi nameyê “Rengê Mezopotamyayî” Hambûrg Kulturhof Itzehoeyî de 15 Çeleyî de do bêra pêşkêşkerdene. Rengê Mezopotamyayî qisim qisim o û nê beşê pêşengehe nê yê; Cinîya ke Dest eşto Mîyane, Gilgamiş, Zerduştîye, Şamanîzm, 4 Cinî 4 Herre, Mûsa Anter, Keynekê Dêrsimî yê Vindîbîyayeyî, Şahmaran û Xoverdayîşê Garîbe Gezere. Fîlîz derheqê xebatanê xo de va, “Kam ke biewno xebatanê mi ra ganî cuya Kurdan tede bivîno û dejanê Kurdan fam bikero. Zulmî, dejî, qetlîamî pê parekerdişî kêmîyenê.”

‘Her berhemê mi yew hîkayeya xo esta’

Fîlîz mecbur menda ke serranê 1990an de Kanîreşa Çewlîgî ra bar kerda şîya Îstanbûl. 2014î de lajê xo Ronîyî reyde bar kerda Almanya. Fîlîz derheqê cuya xo ya Almanya de vana, “Ez û Ronî ma pêşengehan ra gêrenê. Ez wazena lajê mi semedê milet, bawerî û ziwanî ra însanan cîya mekero. Her berhemê mi yew hîkayeya xo esta. Ez wazena lajê mi ziwanê xo yê dayike zî weş bimuso û Ronî nika online ser ra kurs geno. O zî sey mi wazeno Zaningehê Huneranê Rindanî yê Hambûrgî ra mezûn bibo û dima seba perwerdeyê anîmasyonî şoro Amerîka. Xora nika ra perwerdeyê xo yê anîmasyonî dewam keno.”

‘Welatê ma bîyo lete lete’ 

Fîlîz derheqê hîs û tedeyîya berhemanê xo de nîya vana, “Ez yew cinîya ke, welatê mi bîyo lele lete, ez asîmîle bîya û mi welatê xo terk kerdo. Ez wazena nê derdanê xo pê renganê xo weş bikerî. Ez xebatanê xo de bingeyê xo tarîx û mîtolojîyî ra gena. Ez qîmet dana qewetê rengan û ez înan bi nê hîsîyatî şuxilnena.”

MERKEZÊ XEBERAN