Ûzûn: 2023 serra statu û destvisteyan a

Verfekê Komîsyonê Têkilîyanê Teberî yê KNKyî Adem Ûzûn dîyar kerd ke, 2023yî de xebata tewr muhîme awankerdişê komîteya dîplomasîyê neteweyî ya.

Verfekê Komîsyonê Têkilîyanê Teberî yê KNKyî Adem Ûzûnî, roportajê xo yê Rojnameyê Ozgur Polîtîkayî de derheqê xebatanê dîplomasîyî, qetlîamênê Parîsî û xebatanê 2023yî de qisey kerd.

Muhîmîya na serre

Ûzûnî derheqê 2023yî de va, “Serra 2023yî seba Kurdan zaf muhîm a. 6 aşmê verênî zaf muhîm ê. Tena seba dîplomasî ney ma ganî her het ra xo seferber bikerê. Rojhelato Mîyanên û dinya de kaosêk esto. Ma ney ra vanê şerê cîhanî yo hîyêrin. No şer mintiqaya ma de hîna giran yeno ramitene. Merkezê ci zî Kurdistan o. Bingeyê Xoverdayîşê azadîya Kurdistanî paradigmaya Serek Ocalanî esta. Ganî tecrîdê Serek Ocalanî bêro şikitene. Ganî Serek Ocalan wextêkî winasîyî de vengê xo birasno raya pêroyîye, paştî bido haştîye. Tewr muhîm zî ganî Serek Ocalan azad bo. Ma ganî seba ney kede bidê.”

Meseleya yewbîyayîşî

Ûzûnî dîyar kerd ke, meseleya Kurdan a tewr muhîme meseleya yewbîyayîşî ya û va, “Kurdî ganî dormaleyê xoverdayîşê azadîye de bêrê pêser. Ganî vera hêrîşan xoverdayîş bêro pîlkerdiş. Hêza ma û tecrubeyê ma estê. Bakur de Kurdî cayeyî kilîdî de yê. Bê Kurdan hesabêk nîno kerdene. Bê paştîdayîşê Kurdan kes nêşkeno weçînitiş de ser bikewo. Kurdî ganî baş bifikirê û sîyasetê xo bi bingeyê xêza hîrêyine awan bikerê û zelal bibê.”

Wextê statuyî

Ûzûnî dîyar kerd ke, hinî wextê statuyê Kurdan ameyo û va, “Astangîyê ke vernîyê statuyî genê, ganî bi xebatê lobîyî bêrê kerdene. Vera Kurdan fikrê pozîtîfî û sempatîyî estê. Netîceya xoverdayîşan û bedelan de nê ameyê awankerdiş. Çîyê xelet ê ke vera rêxistinanê Kurdan dewletan de ca bîyo ganî bêrê puçkerdiş.”

Seserra newîye

Peynîyê qiseykerdişê xo de Ûzûnî va, “Ma 100 serrî yê Lozanî rê benê nêzdî. Lozan tena leteyêkî ser o ney 4 leteyan ser o zî bandor kerdo. Çalakîyî do bêrê viraştiş û 4 lete ra do rêxistinî, partîyî û sîyasetmedarî bibê beşdarê çalakîyan. Nê çalakîyan ra do konferansêk bêro viraştene. Na xebate do warê mîyanneteweyî de bandoranê muhîman bikera.”

MERKEZÊ XEBERAN